ილია მეორეს 22 მარტს სიონში დაკრძალავენ - Netgazeti

სრულიად საქართველოს კათალიკოს-პატრიარქ ილია მეორეს კვირას, 22 მარტს, ღვთისმშობლის მიძინების სახელობის (სიონის) საკათედრო ტაძარში დაკრძალავენ.

ამის შესახებ ჟურნალისტებს მროველ-ურბნელმა მიტროპოლიტმა იობმა განუცხადა.

სასულიერო პირების ინფორმაციით, ასეთი იყო ილია მეორის სურვილი.

„მე ვიცი, რომ მას უყვარდა სიონი. მე ვიცი, რომ თავიდანვე, 1978 წლიდან ჰქონდა გადაწყვეტილი, სიონის სიახლოვეს ყოფილიყო მარადჟამს“, — განაცხადა ქაშვეთის ეკლესიის მღვდელმსახურმა ელიზბარ ოდიშვილმა.

საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ ეს ცნობა დაადასტურა, თუმცა თქვა, რომ სინოდი გადაწყვეტდა, სად დაიკრძალება პატრიარქი.

სიონში დაკრძალული არიან საქართველოს კათალიკოს-პატრიარქები: კირიონ მეორე, ლეონიდე, ამბროსი ხელაია, ქრისტეფორე III, კალისტრატე, მელქისედეკ III, ეფრემ II, დავით V.