ზელენსკი: მიმაჩნია, რომ ომის პირობებში არჩევნები მთლიანობაში დიდი რისკია. არჩევნები სწორედ ახლა - ეს არის ცუნამი სახელმწიფოსთვის, რომელიც უკრაინას გახლეჩს

ვოლოდიმირ ზელენსკიმ განაცხადა, რომ სრულმასშტაბიანი ომის დროს არჩევნების ჩატარება დიდ რისკებთან არის დაკავშირებული და შესაძლოა საზოგადოებაში განხეთქილება გამოიწვიოს. ამ თემაზე უკრაინის პრეზიდენტმა ჟურნალისტებთან ისაუბრა. მისი თქმით, დაახლოებით ერთი წლის წინ უკრაინას სხვადასხვა მხრიდან მოუწოდებდნენ ომის დროს არჩევნების ჩატარებისკენ.

„ჩემი პოზიცია მკაფიო იყო - თუ პარტნიორები შემოგვთავაზებენ კონკრეტულ პირობებს, რომელთა დროსაც უკრაინაში არჩევნების უსაფრთხოდ, ლეგიტიმურად და დემოკრატიულად ჩატარება იქნება შესაძლებელი - სამხედროების მონაწილეობით, ფრონტისპირა ტერიტორიებზე, საზღვარგარეთ, უსაფრთხოდ - ანუ დარტყმებისა და დაბომბვების გარეშე, მაშინ მოდით განვიხილოთ ეს“, - განაცხადა ზელენსკიმ.

მან ასევე აღნიშნა, რომ მაშინ დასავლელ პარტნიორთაგან არცერთს არ შეუთავაზებია კონკრეტული პირობები, რომლებიც არჩევნების ჩატარების უსაფრთხოების გარანტიას უზრუნველყოფდა. ზელენსკის თქმით, ეს შეუძლებელია მანამ, სანამ რუსეთის პრეზიდენტი ვლადიმერ პუტინი ცეცხლის შეწყვეტას არ დათანხმდება.

„მიმაჩნია, რომ ომის პირობებში არჩევნები მთლიანობაში დიდი რისკია. არჩევნები სწორედ ახლა - ეს არის ცუნამი სახელმწიფოსთვის, რომელიც უკრაინას გახლეჩს. ამიტომ ჩემი სტრატეგიაა, მივიყვანო ქვეყანა ომის დასრულებამდე და შევინარჩუნო დამოუკიდებელი და სუვერენული სახელმწიფო. და მე მას ვასრულებ“, - დასძინა ზელენსკიმ.

გასულ წელს მან განაცხადა, რომ თუ ომის დასრულებას მოახერხებდა, მზად იყო არ მიეღო მონაწილეობა საპრეზიდენტო არჩევნებში.