რევოლუციის 5 მცდელობა და დესტაბილიზაციის არაერთი სცენარი - ლევან მაჭავარიანი ოპოზიციის 6-წლიან გეგმაზე საუბრობს

ქვეყნის გარეთ დაგეგმილი და ქვეყნის შიგნით აღკვეთილი რევოლუციის 5 და დესტაბილიზაციის, ომში ჩართვის არაერთი მცდელობა. ხელისუფლების დამხობის 6-წლიანი გეგმა - ფრაქცია "ქართული ოცნების" თავმჯდომარის მოადგილემ ქრონოლოგიურად, ფაქტობრივი სიზუსტით, ვრცელ წერილში გაიხსენა. ლევან მაჭავარიანი წერს, რომ ენჯეოები და ოპოზიციური პარტიები საკუთარი სამშობლოს წინააღმდეგ, გარე ძალების ინტერესების შესაბამისად მოქმედებაზე, ჯერ კიდევ 2020 წლის საპარლამენტო არჩევნების დროს გადავიდნენ. ხელოვნური კრიზისის გამოწვევის მიზნით, გააყალბა "ისფედმა" ხმების პარალელური დათვლის შედეგებიც. დესტაბილიზაციის მცდელობის უწყვეტმა პროცესმა კულმინაციას 2025 წლის 4 ოქტომბერს, პრეზიდენტის სასახლის შტურმის დროს მიაღწია. სხვადასხვა ფორმით და სხვადასხვა დროს ამოქმედებული რადიკალური სცენარის მიზანი კი, ბოლო 6 წლის განმავლობაში მუდმივად ერთი იყო - დაემხოთ საქართველოს ხელისუფლება.

ძალადობრივ მოვლენებს წინ უძღოდა ტრენინგები საქართველოს მასშტაბით. რევოლუციური პროცესებისთვის კონკრეტული ჯგუფების გადამზადება წლების განმავლობაში ჯერ "აკერმანის" ტრენინგების მეშვეობით, მოგვიანებით კი "კანვასის" ფარულ შეკრებებზე ხდებოდა - ამის შესახებ სახელისუფლებო გუნდი უკვე დიდი ხანია საუბრობს, მათ შორის, ქართულ პოლიტიკაში ენჯეოების გავლით შემოსულ უცხოურ ფულზე, რომელიც რადიკალურ მიზნებს წლების განმავლობაში ხმარდებოდა. პარლამენტის თავმჯდომარემ დღეს კონკრეტული ფაქტებიც გაიხსენა.

სახელისუფლებო გუნდის მიერ მხილებული ოპოზიცია კი დღეს თავის მართლების რეჟიმშია. ბრალდების მთავარი ადრესატების პარტიებში ამტკიცებენ, რომ არც არაჟნების კონტეინერით შემოპარულ ყოფილ პრეზიდენტს ჰქონია რევოლუციური გეგმა და არც გაქცეულ გახარიას ხელისუფლების ჩამოშლის მოტივაცია.

თავის მართლების რეჟიმში მყოფ ოპოზიციას სამშობლოს მტრობაში ადანაშაულებს უმრავლესობის ერთ-ერთი ლიდერი. ვრცელ წერილში ლევან მაჭავარიანი ქვეყნის გარეთ შემუშავებული გეგმის შემსრულებლებისგან ანტისახელმწიფოებრივი ქმედებების გამო საზოგადოების აბსოლუტური უმრავლესობისთვის ბოდიშის მოხდას ითხოვს.

გარე ძალების მიერ შემუშავებული ჰიბრიდული ომისა და დესტაბილიზაციის მცდელობები გაიხსენეს კანონმდებლებმაც. სახელისუფლებო გუნდში ამბობენ, რომ ქვეყნის დაზიანების მრავალწლიანი მცდელობისთვის პასუხისმგებლობა, სწორედ ოპოზიციას და არასამთავრობო ორგანიზაციებიდან მათ იდეურ მოკავშირეებს ეკისრებათ.

სახელისუფლებო გუნდში დარწმუნებული არიან, რომ 6 წლის განმავლობაში, ურთულესი გამოწვევებისა და რევოლუციის არაერთი მცდელობის შემდეგ, თავად ოპოზიციური პარტიების მხარდამჭერების დიდმა ნაწილმაც გააცნობიერა, რომ საქართველოში მშვიდობის გარანტი "ქართული ოცნებაა" - სწორედ ამას წერს ლევან მაჭავარიანი ღია წერილის დასკვნით ნაწილში.