რუსეთმა დონალდ ტრამპის მიერ გამოცხადებული ე.წ. ენერგეტიკული ზავი უკვე დაარღვია - ამის შესახებ უკრაინის საგარეო საქმეთა მინისტრმა ანდრიი სიბიგამ განაცხადა. მისი ინფორმაციით, რუსულმა ძალებმა ხარკოვის მეხუთე თბოელექტროცენტრალზე იერიში მიიტანეს, რის შესახებაც გერმანელ კოლეგას, იოჰან ვადეფულს აცნობა.

სიბიგას განცხადებით, უკრაინა მზად არის ენერგეტიკული ინფრასტრუქტურის ობიექტებზე თავდასხმების სრულად შეწყვეტისთვის, თუ ანალოგიურ ვალდებულებას რუსეთიც შეასრულებს.

„რუსულ ტერორს ძალით, ერთიანობითა და სიმტკიცით უნდა ვუპასუხოთ - უკრაინისთვის სამხედრო დახმარების დამატებითი პაკეტებით, ევროკავშირში გაწევრიანების მოლაპარაკებების კლასტერების გახსნითა და გაყინული რუსული აქტივების სრულად გამოყენებით“, - განაცხადა უკრაინის საგარეო საქმეთა მინისტრმა.

მან გერმანიას უკრაინის მხარდაჭერისთვის მადლობა გადაუხადა და ხაზი გაუსვა ორ ქვეყანას შორის ენერგეტიკის, თავდაცვის წარმოებისა და უკრაინის აღდგენის მიმართულებით თანამშრომლობის მნიშვნელობას.

მანამდე დონალდ ტრამპმა განაცხადა, რომ რუსეთი და უკრაინა ენერგეტიკულ ზავზე შეთანხმდნენ. თუმცა ვოლოდიმირ ზელენსკის თქმით, ეს განცხადება მისთვის მოულოდნელი იყო. უკრაინის პრეზიდენტმა აღნიშნა, რომ კიევი მზად არის ზავის დასაცავად, თუ რუსეთიც შეწყვეტს ენერგეტიკულ ობიექტებზე თავდასხმებს.