„არ მსურს, რუსეთი მოლაპარაკებების მაგიდიდან გავაძევო“ - ტრამპი სანქციების შემსუბუქებას განმარტავს და ზელენსკის აკრიტიკებს

აშშ-ის პრეზიდენტი დონალდ ტრამპი რუსეთის წინააღმდეგ სანქციების შემსუბუქების გამო გამოთქმულ კრიტიკას ეხმაურება და აცხადებს, რომ მოსკოვთან სამშვიდობო მოლაპარაკებების გაგრძელება სურს. თეთრი სახლის ლიდერის თქმით, არ აპირებს ისეთი ნაბიჯის გადადგმას, რომელიც რუსეთს მოლაპარაკებების პროცესიდან გამოთიშავს.

ამის შესახებ ტრამპმა 18 ოქტომბერს სოციალურ ქსელ Truth Social-ზე დაწერა.

„ჩემი გადაწყვეტილება რუსეთთან დაკავშირებით ძალიან მარტივია. ამჟამად რუსეთსა და უკრაინას შორის ომის დასრულებაზე სამშვიდობო მოლაპარაკებებს ვაწარმოებ და არ მსურს ისეთი რამის გაკეთება, რაც რუსეთს უგუნურად ჩამოაშორებს მოლაპარაკებების მაგიდას“, - აცხადებს ტრამპი.

აშშ-ის პრეზიდენტის მტკიცებით, რუსეთი ირანს მხოლოდ მინიმალურ დახმარებას უწევს და ამ ვითარების შენარჩუნებას მნიშვნელოვნად მიიჩნევს.

ტრამპმა კვლავ გააკრიტიკა უკრაინის პრეზიდენტი ვოლოდიმირ ზელენსკი და ის ომის დასრულების შეფერხებაში დაადანაშაულა. მისი შეფასებით, უკრაინის იერიშები რუსეთის ნავთობგადამამუშავებელ ქარხნებზე საერთაშორისო ენერგეტიკულ ბაზარს აზიანებს და საწვავის ფასების ზრდას უწყობს ხელს.

ტრამპის ახალი განცხადება მას შემდეგ გავრცელდა, რაც მისმა ადმინისტრაციამ რუსეთის წინააღმდეგ ახალი სანქციების ამოქმედებაზე დროებითი გამონაკლისი დაუშვა. გადაწყვეტილებას უკრაინასა და აშშ-ის პოლიტიკურ წრეებში კრიტიკა მოჰყვა.