ადგილობრივი წარმოების მხარდაჭერის გარეშე ფასების კომისიების დასკვნები უშედეგო იქნება - რატიშვილი
პურ-ფუნთუშეულის და საკონდიტრო პროდუქციის მწარმოებელი კომპანიის „ემბისი ჯორჯიას“ დირექტორი აცხადებს, რომ ქვეყანაში პროდუქციის ფასების სტაბილურობისთვის ყველაზე მნიშვნელოვანი კომპონენტი ადგილობრივი წარმოების განვითარებაა.
როგორც ალექსანდრე რატიშვილმა BMG-ის პარლამენტის ფასების კომისიის მიერ მომზადებული დასკვნის შეფასებისას განუცხადა, დოკუმენტში მოყვანილი რეკომენდაციების ნაწილი ბუნდოვანია. მისივე თქმით, კომისიას მთავარი აქცენტი ადგილობრივი წარმოების მხარდაჭერის მექანიზმებზე უნდა გაეკეთებინა, რაც მისი თქმით, საბოლოოდ გრძელვადიანი რეკომენდაციების სეგმენტში მოხვდა.
“გამოქვეყნდა საპარლამენტო კომისიის დასკვნა და შემდეგ ამას მალევე მოჰყვა რითეილერების განცხადება სასურსათო კალათების შექმნასთან დაკავშირებით სასურსათო კალათების შექმნა, რომელშიც მოთავსდება პროდუქტები და გაიყიდება ბევრად უფრო იაფად, ვიდრე აქამდე იყიდებოდა.
ცუდი ადამიანი უნდა იყო ძალიან, რომ თქვა, თუ რამე გაიაფდება, ეს ცუდია და არასწორია. თუ გაიაფდება პროდუქცია, რა თქმა უნდა, კარგია. მაგრამ აქ მნიშვნელოვანი არის სისტემური და სტრატეგიული მიდგომა საკითხისადმი და, რა თქმა უნდა, ეს არანაირად არ აგვარებს იმ პრობლემას, რაც დგას ქვეყანაში, რაც წამოიჭრა განსახილველად, რისი ინიციატივითაც მთავრობა გამოვიდა და რისი ინიციატივითაც მთავრობასთან ერთად საპარლამენტო კომისია შეიქმნა, ოთხთვიანი მუშაობა გასწია და მივიღეთ ის, რომ რამდენიმე რითეილერი 15 სახეობის პროდუქტზე დააწესებს დაბალ ფასებს. თუ ამისთვის იყო კომისიის შექმნა საჭირო, ცოტა გაუგებრობასთან გვაქვს საქმე.
ადამიანებისთვის მაინც შეღავათია ეს, მაგრამ ეს არ არის პრობლემის და საკითხის სისტემური მოგვარება. სისტემური მოგვარების შესახებ კომისიის დასკვნაში არის სამ ნაწილად დაყოფილი რეკომენდაციები: მოკლევადიანი, საშუალოვადიანი და გრძელვადიანი. სულ არაფერს, კარგია რომ რაღაც დასკვნა დაიდო, მაგრამ იმდენად ზოგადია, იმდენად ამორფულია იქ გამოყენებული ფრაზები და რეკომენდაციები, ამ წუთის გადმოსახედიდან ბევრის არაფრის მომტანია, რომ ძალიან რთულია რაიმე კონკრეტულ შედეგებზე საუბარი, რომ ამ კომისიის მუშაობის შედეგად შედგენილი და გამოქვეყნებული დასკვნა სისტემურ ჭრილში რაღაც შედეგს მოიტანს.