ალიევი: გვინდა ევროპაში ელექტროენერგიის ექსპორტის შესაძლებლობები გავაფართოოთ - დღეს გზა საქართველოზე გადის

აზერბაიჯანი ევროპულ ბაზარზე ელექტროენერგიის ექსპორტის გაზრდასა და საექსპორტო მარშრუტების გაფართოებას გეგმავს. ამის შესახებ აზერბაიჯანის პრეზიდენტმა, ილჰამ ალიევმა აზერბაიჯანულ ტელევიზიასთან ინტერვიუში განაცხადა.

ალიევის თქმით, ქვეყანას საკმარისზე მეტი ენერგორესურსი აქვს და ნავთობისა და გაზის შემდეგ, მიზანი ევროპაში ელექტროენერგიის მიწოდების მასშტაბების გაზრდაა.

„დღეს ერთადერთი არსებული მარშრუტი საქართველოსა და თურქეთის გავლით გადის, საიდანაც იგი ევროპისკენ მიემართება. ჩვენ ეს შესაძლებლობები უნდა გავაფართოოთ. კერძოდ, უკვე მზად არის შავი ზღვის ენერგოკაბელის პროექტის ტექნიკურ-ეკონომიკური დასაბუთება. თუმცა, მეორე გადამცემი ხაზის არსებობა მხოლოდ განამტკიცებს ჩვენს პოტენციალს“, - განაცხადა ალიევმა.

აზერბაიჯანის პრეზიდენტმა ხაზი გაუსვა იმასაც, რომ ქვეყნის ენერგოსისტემა ამჟამად მჭიდროდ არის დაკავშირებული მეზობელ ქვეყნებთან რუსეთთან, ირანთან, საქართველოსთან, ხოლო საქართველოს გავლით თურქეთთან.

საექსპორტო პოტენციალის ზრდის პარალელურად, აზერბაიჯანი მუშაობს ალტერნატიულ მარშრუტებზეც. ალიევის თქმით, ზანგეზურის ენერგოდერეფნის პროექტი, რომელიც სომხეთის გავლით ნახჭევანს, ხოლო იქიდან თურქეთსა და ევროპას დააკავშირებს, რეგიონში ენერგოსტაბილურობის დამატებითი გარანტი გახდება.

ამასთან, ალიევმა აღნიშნა, რომ აქტიურად განიხილება კასპიის ზღვის ფსკერზე ელექტროკაბელის გაყვანის პროექტიც ყაზახეთთან და უზბეკეთთან თანამშრომლობით, რაც აზერბაიჯანს ენერგიის როგორც მწარმოებელ, ისე მსხვილ სატრანზიტო ჰაბად ჩამოაყალიბებს.