ამ [დამატებითი გაზის] შეთანხმებით შევძლებთ, გაზის არსებული ტარიფების შენარჩუნებას - კობახიძე

ირაკლი კობახიძე არ ამბობს "დამატებითი გაზის" განახლებული ხელშეკრულებით რამდენ მილიონ კუბურ მეტრ გაზს მიიღებს საქართველო აზერბაიჯანიდან, თუმცა ირწმუნება, რომ მოსახლეობისთვის გაზის ტარიფი არ შეიცვლება.

დღეს, 19 მაისს, მთავრობის ადმინისტრაციაში კობახიძემ განაცხადა, რომ აზერბაიჯანთან მიღწეული შეთანხმებები გაზის, ელექტროენერგიისა და ნავთობის ტრანზიტის კუთხით (ბაქო-სუფსის მილსადენი) კომერციული საიდუმლოა და დეტალებზე ვერ ისაუბრებს, თუმცა ამბობს, რომ ხელშეკრულებები ქართული მხარისთვის იდეალურია.

„სამწუხაროდ, ხელშეკრულებებს დეტალურად ვერ განვმარტავ, მათ შორის მოცულობებთან დაკავშირებითაც, მაგრამ ზოგადად შემიძლია გითხრათ, რომ ქვეყანა იქნება უზრუნველყოფილი არა მხოლოდ სათანადო ფასით, არამედ სათანადო მოცულობებითაც, რაც ამ ხელშეკრულებების ერთ-ერთი მთავარი შედეგია. ეს არის ის ზოგადი რამ, რაც შემიძლია გითხრათ: ერთ-ერთი მთავარი შედეგი არის არა მხოლოდ სათანადო ფასი, არამედ სათანადო მოცულობებიც, რაც პრინციპულად მნიშვნელოვანია. ბუნებრივია, ქვეყანამ მიიღო მრავალწლიანი გარანტია როგორც ფასების, ასევე მოცულობების ნაწილში.

საქართველომ მიიღო იდეალური პირობები, რაც მათ შორის, გულისხმობს იმას, რომ ამ შეთანხმებების გათვალისწინებით, ჩვენ შევძლებთ არსებული ტარიფების შენარჩუნებას ეს არის საზოგადოებისთვის მთავარი.

რაც შეეხება ოცწლიან პერიოდს, ოცწლიანი არის რეალურად გაგრძელება, მაგრამ ფორმალურად ეს ახალი ხელშეკრულებაა, თუმცა მაინც იმის გაგრძელებაა, რაც მანამდე იყო. მთლიანობაში, რაც მთავარია ეს შეთანხმებები არ იწვევს საზოგადოებისთვის ტარიფის ზრდას და ეს არის პრინციპული შედეგი, რაც მივიღეთ. მოცულობების კუთხითაც გვაქვს მყარი გარანტიები და ესეც არის ქვეყნისთვის მთავარი მიღწევა", - განაცხადა კობახიძემ.

საქართველო აზერბაიჯანული მხარისგან ბუნებრივ აირს სხვადასხვა წყაროდან იღებს. უმთავრესი კი სამხრეთკავკასიური გაზსადენია, რომლითაც შაჰდენიზის საბადოდან მოპოვებული გაზი საქართველოს გავლით თურქეთსა და ევროკავშირს მიეწოდება. საქართველო აზერბაიჯანული მხარისგან ბუნებრივ აირს სხვადასხვა წყაროდან იღებს. უმთავრესი კი სამხრეთკავკასიური გაზსადენია, რომლითაც შაჰ-დენიზის საბადოდან მოპოვებული გაზი საქართველოს გავლით თურქეთსა და ევროკავშირს მიეწოდება. გატარების სანაცვლოდ საქართველო ორი კონტრაქტით იღებს გაზს: დამატებითი და ოფციური.