ამერიკელი მწარმოებლები ტრამპს ჩინური ავტომობილების შემოყვანის შეზღუდვას სთხოვენ

ამერიკული ავტოინდუსტრია და კონგრესმენები პრეზიდენტ დონალდ ტრამპს ჩინეთთან მოსალოდნელი შეთანხმების თაობაზე მიმართავენ და ჩინური ავტომობილების ამერიკულ ბაზარზე დაშვების აკრძალვას ითხოვენ.

Reuters-ის ინფორმაციით, ინდუსტრიის წარმომადგენლები, ფოლადის მწარმოებლები და პროფკავშირები შიშობენ, რომ პეკინთან გაფორმებულმა არასწორმა ხელშეკრულებამ, შესაძლოა, ამერიკული წარმოება გაანადგუროს. შეშფოთება ტრამპის იანვრის განცხადებამ გამოიწვია, სადაც მან აშშ-ის ტერიტორიაზე ჩინური ქარხნების გახსნისა და ამერიკელების დასაქმების იდეას მხარი დაუჭირა.

მნიშვნელოვანია ითქვას, რომ ჩინურმა ავტომწარმოებლებმა ევროპისა და მექსიკის ბაზრებზე პოზიციები უკვე საგრძნობლად გაიმყარეს. ევროპაში მათი საბაზრო წილი 6%-მდე გაიზარდა, ხოლო მექსიკაში 34 ჩინური ბრენდი ბაზრის 15%-ს აკონტროლებს. ფასებს შორის სხვაობა კრიტიკულია: მაგალითად, Geely-ს ელექტრომობილი მექსიკაში დაახლოებით $22,700 ღირს, რაც Tesla-ს Model 3-ის ამერიკულ ფასზე $15,000-ით ნაკლებია.

ამერიკელი მწარმოებლების განცხადებით, ჩინური კომპანიები სახელმწიფო სუბსიდიების ხარჯზე დემპინგურ ფასებს ადგენენ, რაც სამართლიან კონკურენციას ხელს უშლის.