ანაკლიის პორტის გზისთვის 1.7 მლნ კვ.მ მიწის გამოსყიდვა მიმდინარეობს - ტენდერი 2027-ში იგეგმება
ანაკლიის ღრმაწყლოვან პორტთან დამაკავშირებელი საავტომობილო გზისა და შესაბამისი ინფრასტრუქტურის პროექტის ფარგლებში, ამ ეტაპზე 1.7 მილიონ კვადრატულ მეტრზე მეტი რეგისტრირებული მიწის ნაკვეთის გამოსყიდვის პროცესი მიმდინარეობს - ამის შესახებ ინფრასტრუქტურის სამინისტროს საავტომობილო გზების დეპარტამენტში BMG-ის კითხვაზე პასუხისას განაცხადეს.
დეპარტამენტის ინფორმაციით, უშუალოდ გზის მშენებლობისთვის საჭირო ტენდერის გამოცხადება 2027 წელს იგეგმება, ხოლო პროექტის დაფინანსებაზე შესაბამისი სასესხო ხელშეკრულება ამ დროისთვის გაფორმებული არ არის.
„დღეის მდგომარეობით მიმდინარეობს ანაკლიის საზღვაო ნავსადგურთან დამაკავშირებელი საავტომობილო გზის, რკინიგზისა და შესაბამისი ინფრასტრუქტურის მშენებლობის პროექტის ფარგლებში მომზადებული მიწის შესყიდვისა და განსახლების გეგმით გათვალისწინებული ღონისძიებები“, - ნათქვამია უწყების პასუხში.
დეპარტამენტის განმარტებით, მიწის შესყიდვის ფარგლებში გათვალისწინებულია რეგისტრირებული მიწის ნაკვეთების გამოსყიდვა, რომელთა საერთო ფართობი 1 720 553 კვადრატულ მეტრს შეადგენს.
ამასთან, პროექტის ფარგლებში იგეგმება 35 კვ ძაბვის ელექტროგადამცემი ხაზის დაცვის ზონისთვის გათვალისწინებული მიწის ნაკვეთების სერვიტუტით დატვირთვა, რომლის ჯამური ფართობი 74 824 კვადრატული მეტრია.
უწყების ინფორმაციით, მიწის შესყიდვისა და განსახლების გეგმა ასევე მოიცავს დაურეგისტრირებელ მიწის ნაკვეთებზე არსებული აქტივების — შენობა-ნაგებობების, ხე-მცენარეებისა და ერთწლიანი კულტურების — საკომპენსაციო ღონისძიებებს.
„პროექტის ფარგლებში პირველი ექვსი თვის განმავლობაში დახარჯულია 19 მილიონ ლარზე მეტი. მიწის შესყიდვის და განსახლების გეგმით გათვალისწინებული განსახლების ბიუჯეტი შეადგენს 40 142 131 ლარს“, - აღნიშნულია საავტომობილო გზების დეპარტამენტის პასუხში