არასწორია ერთგვაროვანი მიდგომა მცირე და მსხვილი ბიზნესის მიმართ - ზურაბ ძნელაშვილი "წინასწარი გადაწყვეტილების" ტარიფებზე
2027 წლის 1 იანვრიდან საქართველოში წინასწარი გადაწყვეტილების მიღების მომსახურების საფასური ორმაგდება. აღნიშნულ ცვლილებას BMG-სთან უარყოფითად აფასებს იურიდიული კომპანია Tax & Legal Solutions-ის დამფუძნებელი ზურაბ ძნელაშვილი.
მისი განმარტებით, აღნიშნული გადაწყვეტილება სერიოზულ ბარიერებს შეუქმნის მცირე და საშუალო ბიზნესს და გაზრდის საგადასახადო დავების რისკს.
ზურაბ ძნელაშვილის თქმით, არსებული ტარიფი, რომელიც რეზიდენტი ფიზიკური პირებისთვის 5 000 ლარს, ხოლო იურიდიული პირებისთვის10 000 ლარს შეადგენს, ისედაც მაღალი იყო. ცვლილების შედეგად კი ბიზნესსუბიექტებს მომსახურება 20 000 ლარი დაუჯდებათ.
„20 000 ლარი უკვე ძალიან დიდი თანხაა საქართველოს პირობებში ბიზნესისთვის. ამ ცვლილებით კი, წინასწარი გადაწყვეტილების სერვისი ელიტურ სერვისად იქცევა, იმიტომ რომ მხოლოდ მსხვილ ბიზნესს შეეძლება სარგებლობა, მხოლოდ მსხვილი ბიზნესი გაიმეტებს ამხელა თანხას წინასწარი გადაწყვეტილების ასაღებად. რაც შეეხება მცირე და საშუალო ბიზნესს, ისინი პრაქტიკულად ვეღარ შეძლებენ ამ წინასწარი გადაწყვეტილებით სარგებლობას, რაც, რა თქმა უნდა, უარყოფითად იმოქმედებს როგორც ბიზნესის, ასევე სახელმწიფოზეც და გადასახადების ადმინისტრირებაზე“ - აცხადებს ძნელაშვილი BMG-სთან.
მისი განმარტებით, წინასწარი გადაწყვეტილება არის მექანიზმი, რომელიც ბიზნესს საშუალებას აძლევს წინასწარ შეუთანხმოს საგადასახადო ორგანოს დაგეგმილი ოპერაციის ბეგრის წესი. ეს ინსტრუმენტი დავების პრევენციას ემსახურება. საფასურის გაზრდა კი ბიზნესს აიძულებს, საკუთარი ინტერპრეტაციით იმოქმედოს, რაც ხშირად შეცდომებს, დაჯარიმებას და ხანგრძლივ სასამართლო დავებს იწვევს. ამასთან, ზურაბ ძნელაშვილი ყურადღებას ამახვილებს საქართველოს საგადასახადო კანონმდებლობის არასტაბილურობაზეც.
„საქართველოში ეს არ შეიძლება იყოს ასეთი ძვირიანი სერვისი, იმიტომ რომ ძალიან ცვალებადია კანონმდებლობა. არა მარტო კანონმდებლობა, საგადასახადო ორგანოს და სდავების განმხილველი პრაქტიკაც იცვლება ხშირად. სასამართლოს პრაქტიკა პრაქტიკულად, არ არსებობს, იმიტომ რომ საგადასახადო შეთანხმების წყალობით, ძალიან იშვიათად, თუ დავა მიაღწევს უზენაეს სასამართლომდე და ძალიან იშვიათ შემთხვევაში უწევს უზენაეს სასამართლოს განმარტებების გაკეთება. ამ პირობებში, როდესაც კანონმდებლობა არასტაბილურია, არ გვაქვს ერთგვაროვანი პრაქტიკა, არ გვაქვს მყარი სასამართლო პრაქტიკა ამა თუ იმ საგადასახადო ინსტიტუტთან დაკავშირებით, ეს ერთადერთი გზა არსებობს, რომ ბიზნესმა დაიზღვიოს თავი შეცდომებისგან, დაჯარიმებისგან, დავისგან.