არსებობს ალბათობა, რომ ირანი კიდევ ერთხელ დავბომბოთ, შესაძლოა, ეს ხვალვე გავაკეთოთ - ტრამპი

აშშ-ის პრეზიდენტმა დონალდ ტრამპმა ირანის წინააღმდეგ ახალი სამხედრო დარტყმები არ გამორიცხა და განაცხადა, რომ თეირანთან დაკავშირებით მუდმივი გამოსავლის პოვნა სურს, რათა ქვეყანამ ბირთვული იარაღის შექმნა ვერ შეძლოს.

„ამაზე ვფიქრობთ და შესაძლოა, ეს ხვალვე გავაკეთოთ. მართლა გგონიათ, რომ გეტყვით, ვაპირებ თუ არა ამის გაკეთებას? არსებობს იმის ალბათობა, რომ ირანს კიდევ დავბომბავ. ასევე არსებობს იმის ალბათობაც, რომ მივაღწიოთ კარგ, დიდებულ, შესანიშნავ შეთანხმებას. მათ სურთ შეთანხმების მიღწევა, მაგრამ პრობლემა ისაა, შეასრულებენ თუ არა ისინი ამ შეთანხმებას“, – განაცხადა დონალდ ტრამპმა.

მისი თქმით, ირანის ლიდერებს შეთანხმების მიღწევა სურთ, თუმცა საკითხავი ის არის, დაიცავენ თუ არა მას. ტრამპმა აღნიშნა, რომ 2025 წელს B-2 ტიპის ბომბდამშენების მიერ განხორციელებული დარტყმების შემდეგ სამხედრო კამპანიის შეწყვეტა ირანს ბირთვული შესაძლებლობების აღდგენის საშუალებას მისცემდა.

„მე ეს პროცესი მუდმივი უნდა გავხადო. ეს არის ერთადერთი მიზეზი, რის გამოც ამას ასე დიდხანს ვაკეთებ“, - დასძინა აშშ-ის პრეზიდენტმა.

ტრამპის განცხადებამდე ცოტა ხნით ადრე, პაკისტანში ირანის ელჩმა, რეზა ამირი მოღადამმა განაცხადა, რომ თეირანმა პაკისტანელი შუამავლების მეშვეობით ვაშინგტონს ჰორმუზის სრუტის გახსნა შესთავაზა, თუ აშშ ირანული პორტების საზღვაო ბლოკადას მოხსნის.

Associated Press-ის ცნობით, ისლამაბადში გამართულ სემინარზე გამოსვლისას ელჩმა აღნიშნა, რომ ირანი კვლავ ღიაა მოლაპარაკებებისთვის ივნისში მიღწეული შუალედური შეთანხმების ფარგლებში, რომელიც პაკისტანისა და კატარის შუამავლობით მომზადდა. აღნიშნული ჩარჩო ითვალისწინებდა სრუტეში ნაოსნობის აღდგენას, ბლოკადის მოხსნას და ირანის ბირთვულ პროგრამაზე ფართო შეთანხმებაზე მსჯელობის დაწყებას. მოღადამმა ტრამპი ინიციატივის უარყოფაში დაადანაშაულა.