აშშ-მა ირანულ ნავთობს სანქციები ხელახლა დაუწესა
ამერიკის შეერთებულმა შტატებმა ირანულ ნავთობს სანქციები ხელახლა დაუწესა. გადაწყვეტილების მიზეზი ჰორმუზის სრუტეში კომერციულ გემებზე განხორციელებული თავდასხმები გახდა, რასაც ვაშინგტონი სრულიად მიუღებელს უწოდებს. აშშ-ის ოფიციალური პირის განცხადებით, ამ ნაბიჯს შესაბამისი შედეგები მოჰყვება. სანქციების აღდგენის ფონზე, მსოფლიო ბაზარზე ნავთობის ფასი უკვე 5%-ზე მეტით გაიზარდა.
გასულ თვეში აშშ-ის ხაზინამ, ვაშინგტონსა და თეირანს შორის არსებული მყიფე შეთანხმების ფარგლებში, ირანს ნავთობის გაყიდვის ნება 21 აგვისტომდე დართო. თუმცა, სამშაბათს მიღებულმა გადაწყვეტილებამ ეს პერიოდი მკვეთრად შეამცირა და ბოლო ვადად 17 ივლისი განისაზღვრა.
ამერიკის ეს ნაბიჯი მოჰყვა ბრიტანეთის სამხედრო-საზღვაო ძალებთან დაკავშირებული სააგენტოს ანგარიშს, რომლის მიხედვითაც, ბოლო დღეებში ჰორმუზის სრუტეში უცნობი ჭურვებით სამი ტანკერი დააზიანეს. აშშ-ის ოფიციალური პირის განცხადებით, პირველადი მონაცემები მიუთითებს, რომ კომერციულ გემებს ცეცხლი სწორედ ირანმა გაუხსნა. თეირანს მომხდარზე ჯერჯერობით კომენტარი არ გაუკეთებია და პასუხისმგებლობაც არავის აუღია.
ჰორმუზის სრუტე, რომელიც ირანსა და ომანს შორის მდებარეობს, მსოფლიოს ერთ-ერთი უმნიშვნელოვანესი ენერგეტიკული დერეფანია. ომის დაწყებამდე მასზე გლობალური ნავთობისა და გათხევადებული ბუნებრივი აირის (LNG) გადაზიდვების დაახლოებით მეხუთედი მოდიოდა.
ნავთობის ექსპორტი ირანისთვის კრიტიკულად მნიშვნელოვანი შემოსავლის წყაროა. მრავალწლიანი სანქციებით დასუსტებული ეკონომიკის ფონზე, თეირანმა ბოლო წლებში მაინც მოახერხა მიწოდების გაზრდა, ძირითადად ჩინეთის მიმართულებით, რაც ქვეყნის მთავარ ეკონომიკურ საყრდენად იქცა.
BM.GE
წყარო: bm.ge