აუზ „Blue Drop“-ში მომსახურება 10 ლარით გაძვირდა - ფასები და სეზონის გამოწვევები

აუზის Blue Drop-ის მენეჯერის, ელენე შოშიტაშვილის თქმით, მიმდინარე სეზონის შეფასება წინა წელთან შედარებით რთულია, რადგან ამ დრომდე ამინდების არასტაბილურობამ ვიზიტორთა ნაკადზე პირდაპირი გავლენა იქონია. ამის შესახებ მან BM.GE-სთან საუბარში განაცხადა.

როგორც შოშიტაშვილი აღნიშნავს, კომპლექსი უკვე მეოთხე წელია ფუნქციონირებს და მომხმარებლებს აუზს, ბარსა და სამზარეულოს სთავაზობს. მისი თქმით, ვიზიტორთა რაოდენობა დიდწილად ამინდებზეა დამოკიდებული და სეზონის სრულად შეფასება ჯერ ვერ ხერხდება.

„ უკვე გავიხსენით. ადგილობრივი და უცხოელი მომხმარებლების წილი ჯერჯერობით 50/50-ზე არის. რადგან ამინდები არ ყოფილა, ისე ვერ შევადარებ წინა წელს, იმიტომ, რომ წინა წელს, ამინდებიდან გამომდინარე ძალიან დატვირთული პერიოდი გვქონდა. ახლა ამინდები როგორც კი გამოვიდა და კარგი ამინდებია, რა თქმა უნდა, სტუმრების რაოდენობა იმატებს", - აღნიშნავს ელენე შოშიტაშვილი.

როგორც ის განმარტავს, აუზის სტუმრების ნაწილი უცხოელი ტურისტები არიან, ძირითადად კი რუსეთისა და უკრაინის მოქალაქეები : „უცხოელები არიან ძირითადად რუსეთი, უკრაინა", - ამბობს მენეჯერი.

შოშიტაშვილის თქმით, მომსახურების ფასებიც დაკორექტირდა, რაც ზოგადი გაძვირების ფონზე გახდა აუცილებელი.

"ფასები ჩვენც დავაკორექტირეთ, იმიტომ რომ ფიზიკურად სხვა გზა არ არის, ყველაფერი გაძვირდა. 10 ლარით გავაძვირეთ სერვისი და აუზით სარგებლობის ღირებულება ახლა 100 ლარია. თუმცა ბევრი კარგი აქციები გვაქვს", - აცხადებს ის.