ბათუმის შემოვლითი გზის სასესხო პროექტის დასრულება გადავადდა - შეთანხმება ADB-თან

საქართველოს მთავრობამ და აზიის განვითარების ბანკმა (ADB), ჯერ კიდევ 2017 წელს, ბათუმის შემოვლითი გზის მშენებლობის შესახებ გაფორმებული 108 მილიონი ევროს სასესხო შეთანხმების მეხუთე ცვლილებას მოაწერეს ხელი. სესხის დახურვის თარიღი განსაზღვრული იყო 2025 წლის 31 დეკემბრით და ის 2026 წლის 31 დეკემბრამდე გადავადდა.

საქმე ისაა, რომ ბათუმის შემოვლითი მაგისტრალი, რომლის მშენებლობაც 330 მილიონი ლარი დაჯდა, 2024 წლის ოქტომბერში გაიხსნა, თუმცა პროექტთან დაკავშირებით სასესხო შეთანხმებაში განხორციელებული ცვლილებები მოიცავდა არამხოლოდ ამ მაგისტრალის მშენებლობის დასრულებას, არამედ სხვა პროექტების განხორციელებასაც, რომელთა დასრულება 2026 წლის 31 დეკემბრამდე გადავადდა.

ცვლილებების ისტორია

პროექტის მიმდინარეობისას სასესხო შეთანხმებაში არაერთი მნიშვნელოვანი კორექტირება შევიდა. სესხის ფარგლებში წარმოქმნილი დანაზოგებითა და რესურსების რეალოკაციით დაფინანსდა ისეთი დამატებითი სამუშაოები, როგორიცაა:

• ბაკურციხე-წნორის გზის მონაკვეთისა და ფოთის ხიდის მშენებლობა. • ბათუმი-სარფის მონაკვეთის დეტალური პროექტირება. • თბილისი (გლდანი)-თიანეთის გზისა და მეწყრული ზონების რეაბილიტაცია (რომელიც მოგვიანებით მე-4 ცვლილებით გაუქმდა და თანხები ისევ ბათუმის შემოვლითი გზის მშენებლობასა და ზედამხედველობაზე მიიმართა). სწორედ აღნიშნული სამუშაოების დასრულებას მიება ხელშეკრულების ვადის გადაწევა.

№5 ცვლილების წერილ-შეთანხმებას ხელი 2026 წლის 2 აპრილს მოეწერა, რაც უზრუნველყოფს პროექტის შეუფერხებელ დასრულებას განახლებულ ვადებში.

ADB-ის მიერ გამოყოფილი სესხი 24-წლიანია (აქედან 13 წელი შეღავათიანია) და მისი საპროცენტო განაკვეთი EURIBOR +0.7%-ს შეადგენს.