ბათუმში, აეროპორტის მიმდებარედ ახალი საცხოვრებელი კომპლექსის მშენებლობა იგეგმება

ბათუმში, საერთაშორისო აეროპორტის მიმდებარედ, გიორგი ანწუხელიძისა და დავით კაკაბაძის ქუჩებზე, ახალი მრავალბინიანი საცხოვრებელი კომპლექსის მშენებლობა იგეგმება. პროექტისთვის განაშენიანების დეტალური გეგმა ბათუმის საკრებულომ 29 მაისს დაამტკიცა. პროექტის ინვესტორია შპს "არტექს ინვესტი".

საპროექტო ტერიტორია მოიცავს ექვს მიწის ნაკვეთს, რომელთა საერთო ფართობი 7 623 კვადრატული მეტრია. პროექტის ფარგლებში დაგეგმილია მრავალბინიანი საცხოვრებელი სახლის განთავსება შესაბამისი სატრანსპორტო და საინჟინრო ინფრასტრუქტურით, ავტოსადგომებითა და გამწვანებული სივრცეებით.

პროექტის ტექნიკურ-ეკონომიკური მაჩვენებლების თანახმად, განაშენიანების ფართობი 34 303 კვადრატული მეტრი იქნება. საცხოვრებელი ნაწილი 532 ბინას მოიცავს, რომელთა ჯამური ფართობი 18 603 კვადრატული მეტრია. დამატებით, პროექტში 2 086 კვადრატული მეტრი საზოგადოებრივი დანიშნულების ფართიცაა გათვალისწინებული.

პროექტის მიხედვით, კომპლექსის მაქსიმალური სიმაღლე 36.75 მეტრი იქნება. დაგეგმილია 10 მიწისზედა და ერთი მიწისქვეშა სართულის მოწყობა. პროექტი 165 ავტოსადგომის მოწყობას ითვალისწინებს. ავტოსადგომები ნაწილობრივ მიწისქვეშ, ნაწილობრივ კი ღია მიწისზედა სივრცეში განთავსდება.

დეტალური გეგმის მიხედვით, კომპლექსი ბათუმის საერთაშორისო აეროპორტიდან დაახლოებით 1.5 კილომეტრში მდებარეობს.

დოკუმენტის თანახმად, პროექტის განხორციელება კერძო ინვესტიციით იგეგმება და მისი დასრულების ვადად 2031 წლის 31 დეკემბერია განსაზღვრული. ავტორების შეფასებით, მშენებლობა ხელს შეუწყობს ტერიტორიის ურბანულ განვითარებას, საცხოვრებელი ფონდის ზრდასა და ახალი სამუშაო ადგილების შექმნას.

ბიზნეს რეესტრის თანახმად, კომპანია "არტექს ინვესტი" 2025 წლის აგვისტოში არის დაფუძნებული და მისი 100%-ის წილი გოჩა აფაქიძეს ეკუთვნის.