ბოლო პერიოდში კლების შემდეგ, საავიაციო საწვავზე ფასმა მცირედით მოიმატა

ბოლო კვირებში კლების შემდეგ, საავიაციო საწვავზე ფასმა მცირედით 2%-ით მოიმატა და ბარელზე საშუალო ფასმა კვირის ჭრილში 119 დოლარი შეადგინა, თუმცა წინა თვესთან შედარებით, ფასი კვლავ 8%-ით დაბალია.

საჰაერო ტრანსპორტის საერთაშორისო ასოციაციის (IATA) ინფორმაციით, რეგიონების მიხედვით საწვავზე ფასი განსხვავებულია. აზიაში საშუალო ფასი 115 დოლარს შეადგენს, ევროპაში 122 დოლარს, ხოლო ახლო აღმოსავლეთში - 110 დოლარს.

აღსანიშნავია, რომ მიმდინარე წლის მარტში, ირანი-აშშ-ის სამხედრო დაპირისპირების დროს საწვავზე ფასი გაორმაგდა და 200 დოლარსაც აჭარბებდა.

საავიაციო საწვავის გაიაფების მიზეზი აშშ-ირანის სამშვიდობო შეთანხმება იყო. 14 ივნისს, აშშ-ის პრეზიდენტმა დონალდ ტრამპმა ირანთან სამშვიდობო შეთანხმების შესახებ განაცხადა. მისივე თქმით, ჰორმუზის სრუტე, რომელიც მსოფლიო ნავთობის თითქმის მეხუთედს ატარებს, ირანთან სამშვიდობო შეთანხმების ხელმოწერის შემდეგ ხელახლა გაიხსნება. ეს სრუტე თებერვლის ბოლოდან სრულად ჩაკეტილი იყო, რამაც მსოფლიოში ყველა ტიპის საწვავი გააძვირა.