ჩინეთის ეკონომიკა 4.3%-ით გაიზარდა, რაც 2022 წლის შემდეგ ყველაზე ცუდი შედეგია

ჩინეთის ეკონომიკა მიმდინარე წლის მეორე კვარტალში 4.3%-ით გაიზარდა. არსებული ინფორმაციით, ეს მონაცემი 2022 წლის ბოლო კვარტალის შემდეგ დაფიქსირებული ყველაზე სუსტი მაჩვენებელია. ეკონომისტები ვარაუდობდნენ, რომ ზრდა 4.5%-ზე მეტი იქნებოდა, თუმცა რეალურმა შედეგმა ბაზრის მოლოდინი ვერ გაამართლა. შედარებისთვის, პირველ კვარტალში ქვეყნის მთლიანი შიდა პროდუქტი 5%-ით გაიზარდა.

რაც შეეხება გამოქვეყნებული მონაცემების დეტალებს, წლის პირველ ექვს თვეში ურბანული ძირითადი კაპიტალის ინვესტიციები 5.7%-ით შემცირდა. ეს იმ ფონზე, როცა ანალიტიკოსები ბევრად მცირე, 4.9%-იან ვარდნას პროგნოზირებდნენ. ოფიციალური მონაცემების მიხედვით, უძრავი ქონების სექტორში ინვესტიციები 18%-ით დაეცა. ამასთან, ინფრასტრუქტურასა და წარმოებაში კაპიტალდაბანდებამ 2.4%-ით იკლო.

ინვესტიციების შემცირების მიუხედავად, ივნისში ჩინეთის საცალო გაყიდვები 1%-ით გაიზარდა და გადააჭარბა ეკონომისტების პროგნოზს, რომლებიც მაჩვენებლის 0.1%-იან კლებას ელოდნენ. ცნობისთვის, წინა თვეში საცალო გაყიდვები 0.6%-ით იყო შემცირებული. აღსანიშნი ფაქტია, რომ დადებითი დინამიკა დაფიქსირდა სამრეწველო წარმოების მიმართულებითაც, სადაც ივნისის თვეში წლიურმა ზრდამ 5.3% შეადგინა.

შეგახსენებთ, რომ ჩინეთის მთავრობამ მიმდინარე წლის ეკონომიკური ზრდის სამიზნე მაჩვენებელი 4.5%-დან 5%-მდე შუალედში განსაზღვრა. ეს კი ბოლო ათწლეულების განმავლობაში დაფიქსირებული ყველაზე დაბალი სამიზნე მაჩვენებელია.