ჩინეთში დონალდ ტრამპის ვიზიტი დაიწყო

აშშ-ის პრეზიდენტ დონალდ ტრამპის თვითმფრინავი პეკინის აეროპორტში დაეშვა. მას ტრაპთან ჩინეთის ვიცე-პრეზიდენტი ჰან ჯენი დახვდა. ამასთან, ჩინურმა მხარემ ამერიკელი ლიდერისთვის საზეიმო დახვედრის ცერემონია გამართა.

შტატების ლიდერის პეკინში ჩაფრენით მისი ორდღიანი სახელმწიფო ვიზიტი უკვე ოფიციალურად იწყება. როგორც ირკვევა, ის ჩინელ კოლეგასთან ვაჭრობისა და გლობალური უსაფრთხოების საკითხებზე მაღალი დონის მოლაპარაკებებს გამართავს.

მხარეები ტექნოლოგიების, ვაჭრობისა და ტაივანის ირგვლივ არსებულ რთულ საკითხებს განიხილავენ. განსაკუთრებული ყურადღება ირანის ომსა და მის მიერ გამოწვეულ ენერგეტიკულ კრიზისს დაეთმობა. არსებული ინფორმაციით, აშშ-ის პრეზიდენტი სი ძინპინისგან ჰორმუზის სრუტის გახსნისა და სამშვიდობო შეთანხმების მიღწევის მიზნით ირანზე ზეწოლას მოითხოვს.

აღსანიშნავია, რომ პრეზიდენტის ბორდზე იმყოფება და მის დელეგაციას შეუერთდნენ გავლენიანი ამერიკული ბიზნესლიდერებიც, მათ შორის Apple-ის მოქმედი ხელმძღვანელი ტიმ კუკი და Tesla-ს დამფუძნებელი ილონ მასკი. პრეზიდენტს თან ახლავს სახელმწიფო მდივანი მარკო რუბიო და Nvidia-ს ხელმძღვანელი ჯენსენ ჰუანგიც, რომელიც ბოლო დღეების განმავლობაში ჩასვლას კატეგორიულად გამორიცხავდა.

აქვე ისიც უნდა ითქვას, რომ ტრამპის ჩასვლას ჩინურ სოციალურ ქსელებში დიდი გამოხმაურება უკვე მოჰყვა. ამჟამად სოციალურ პლატფორმა WeChat-ზე ყველაზე პოპულარული ჰეშთეგია #WelcomeTrumpToChina.