Dell-მა Apple-თან კონკურენციისთვის ახალი ლეპტოპი XPS 13 წარადგინა

ამერიკულმა ტექნოლოგიურმა კომპანია Dell-მა Apple-ის ერთ-ერთ ყველაზე გაყიდვად და ბიუჯეტურ ნოუთბუქ MacBook Neo-სთან კონკურენციის მიზნით ახალი, ყველაზე ხელმისაწვდომი ლეპტოპი - XPS 13 წარადგინა.

არსებული ინფორმაციით, დასახელებული მოდელის საწყისი ფასი $699 იქნება, თუმცა სასწავლო სეზონის განმავლობაში 16 წლისა და უფროსი ასაკის მოსწავლეებისა თუ სტუდენტებისთვის მოწყობილობის ფასი $599-მდე შემცირდება. როგორც ირკვევა, ამ ნაბიჯით კომპანია ბაზრის წილის გაზრდას და Apple-თან პირდაპირ კონკურენციაში შესვლას გეგმავს.

რაც შეეხება თავად XPS 13-ს, ის მწარმოებლის ყველაზე თხელი და მსუბუქი მოდელია. მას კონკურენტთან შედარებით უფრო დიდი ეკრანი და ნაკლები წონა აქვს. Dell-ის ბიუჯეტური ლეპტოპი Intel-ის Core Series 3-ის პროცესორებით იქნება აღჭურვილი და გაყიდვაში მიმდინარე თვეში ჩაეშვება. რაც შეეხება შედარებით მძლავრ Intel Core Ultra Series 3-ის პროცესორზე მომუშავე ვერსიას, მისი ხილვა მომხმარებლებს ზაფხულის ბოლოს შეეძლებათ.

როგორც კომპანიის საოპერაციო დირექტორმა ჯეფ კლარკმა პროდუქტის პრეზენტაციის შემდეგ განაცხადა, მომხმარებლები ხელმისაწვდომ ფასად უკეთეს ალტერნატივებს იმსახურებენ.

შეგახსენებთ, რომ Dell-ის კონკურენტმა კომპანია Apple-მა უახლესი ბიუჯეტური ლეპტოპი MacBook Neo მიმდინარე წლის მარტში წარადგინა და ის Chromebook-ების ბაზარზე უპირობო ლიდერად იქცა. ლეპტოპის საწყისი ფასი $599 დოლარია, ფასდაკლებით კი $499 დოლარსაც კი აღწევს. საყურადღებო ფაქტია, რომ ის Apple-ის ტელეფონებისთვის განკუთვნილი ჩიპითაა აღჭურვილი.