დონალდ ტრამპის „ოქროს ბარათის“ პროგრამა წარუმატებელი აღმოჩნდა

"აშშ-ის პრეზიდენტის ინიციატივამ, რომელიც 1 მილიონ დოლარად ქვეყნის რეზიდენტობის სწრაფად მიღებას ითვალისწინებდა, კრახი განიცადა" - წერს CNBC. როგორც ირკვევა, ამ დროისთვის განაცხადი მხოლოდ 338-მა ადამიანმა წარადგინა.

შიდა უსაფრთხოების დეპარტამენტის მონაცემებით, სავიზო მოსაკრებელი, რომელიც $15,000-ს შეადგენს, მხოლოდ 165-მა პირმა გადაიხადა. ეს მაჩვენებელი რადიკალურად განსხვავდება ვაჭრობის დეპარტამენტის ხელმძღვანელის, ჰოვარდ ლუტნიკის პროგნოზისგან, რომელიც პროგრამიდან $100 მილიარდის მობილიზებას ელოდა.

რაც შეეხება პროცედურულ დეტალებს, როგორც აღმოჩნდა დაპირებული „რეკორდული დრო“ სინამდვილეს არ შეესაბამება. სასამართლო დოკუმენტებიდან ირკვევა, რომ „ოქროს ბარათის“ მაძიებლები ვიზებს პრიორიტეტულად ვერ იღებენ. უსაფრთხოების დეპარტამენტის განმარტებით, ამ კატეგორიის განმცხადებლების აპლიკაციებისთვის ჩვეულებრივი სავიზო რეჟიმის მსგავსი ვადებია განსაზღვრული.

მნიშვნელოვანია ითქვას, რომ ინიციატივის ლეგიტიმურობას სასამართლოში „დემოკრატიის დამცველთა ფონდი“ უკვე ასაჩივრებს. ორგანიზაცია მიიჩნევს, რომ პრეზიდენტის ბრძანებულება დისკრიმინაციულია და ის EB-1 და EB-2 კატეგორიის სხვა კვალიფიციურ კანდიდატებს უსამართლო პოზიციაში აყენებს.

ამასთან, საინვესტიციო ვიზების სპეციალისტები ახალი სისტემის მიმართ სკეპტიციზმს გამოხატავენ. როგორც ირკვევა, მდიდარი ადამიანები უპირატესობას EB-5 პროგრამას ანიჭებენ, სადაც $800,000-ის ინვესტიციაა საჭირო. „ოქროს ბარათისგან“ განსხვავებით, აღნიშნული მოდელი ინვესტირებას გულისხმობს და არა სახელმწიფოსთვის თანხის უსასყიდლოდ გადაცემას.

ექსპერტების შეფასებით, ვიდრე კონგრესი ინიციატივას არ დაამტკიცებს, პოტენციური კანდიდატები $1 მილიონის რისკზე წასვლას მოერიდებიან.

შეგახსენებთ, რომ „ოქროს ბარათის“ პროგრამა 2025 წლის დეკემბერში ამოქმედდა. ის დონალდ ტრამპის აღმასრულებელი ბრძანებულებით შეიქმნა და უცხოელი ინვესტორების მოზიდვას ისახავს მიზნად. ცნობისთვის, EB-1 და EB-2 ვიზები ტრადიციულად განსაკუთრებული ნიჭის მქონე ადამიანებისთვის ან სახელმწიფო ინტერესებიდან გამომდინარე გაიცემა.