Dunkin’-ის მფლობელმა კომპანია Inspire Brands-მა IPO-სთვის განაცხადი შეიტანა

Dunkin’-ის მფლობელმა კომპანია Inspire Brands-მა აქციების პირველადი საჯარო შეთავაზებისთვის (IPO) კონფიდენციალური განაცხადი შეიტანა.

თუ Inspire ბირჟაზე გავა, ეს სარესტორნო სფეროში ერთ-ერთი ყველაზე მასშტაბური შეთავაზება იქნება. გავრცელებული ინფორმაციით, კერძო საინვესტიციო კომპანია Roark Capital-ი, რომელიც Inspire-ს უჭერს მხარს, კომპანიის დაახლოებით 20 მილიარდ დოლარად შეფასებას ისახავს მიზნად.

Inspire 2018 წელს Arby’s-ისა და Buffalo Wild Wings-ის შერწყმის შედეგად დაარსდა. ამას მოჰყვა სხვა შესყიდვებიც: 2018 წლის ბოლოს Sonic Drive-In-ის, ხოლო 2019 წელს Jimmy John’s-ის შეძენა. 2020 წელს კი Inspire-მა 11 მილიარდი დოლარის ღირებულების გარიგებით Dunkin’ და Baskin Robbins შეისყიდა და ისინი კერძო კომპანიებად აქცია.

ვებსაიტის თანახმად, აღნიშნული ექვსი ქსელის გაერთიანებით Inspire-ი მსოფლიოს მასშტაბით 33 300-ზე მეტ რესტორანს ფლობს, მისი წლიური გაყიდვები კი 33.4 მილიარდ დოლარს შეადგენს.

Inspire-ი ერთადერთი სარესტორნო კომპანია არ არის, რომელიც IPO-ს გეგმავს. გასულ თვეში კომპანია Jersey Mike’s-მაც განაცხადა, რომ აშშ-ის ფასიანი ქაღალდებისა და ბირჟების კომისიაში (SEC) კონფიდენციალური განაცხადი შეიტანა.

აქციების პირველადი საჯარო შეთავაზებების ბაზარი ჯერჯერობით პასიურია, თუმცა წლის ბოლოსკენ სიტუაცია შესაძლოა შეიცვალოს. ბაზრის მერყეობამ, ეკონომიკურმა გაურკვევლობამ და ახალი საჯარო კომპანიების აქციების ბოლოდროინდელმა სუსტმა მაჩვენებლებმა ბირჟაზე გასვლის მსურველთა დაგროვება (ე.წ. Backlog) გამოიწვია.

მიუხედავად ამისა, მომდევნო თვეებში მოსალოდნელია რამდენიმე მასშტაბური IPO-ს განხორციელება. მათ შორისაა SpaceX-ის შეთავაზება, რომელმაც შესაძლოა კომპანიის ღირებულება 1 ტრილიონ დოლარზე მეტად განსაზღვროს.