"ძალიან მიჭირს ამაზე საუბარი. ის ჩვენი ყოფილი თანაგუნდელია" - კალაძე ირაკლი ღარიბაშვილზე

თბილისის მერს და "ქართული ოცნების" გენერალურ მდივანს უჭირს ყოფილი თანაგუნდელის ირაკლი ღარიბაშვილისთვის ახალი ბრალის წარდგენის შესახებ საუბარი და აცხადებს, რომ ქვეყანაში როგორც ექსპრემიერის, ისე ყველა პატიმრის უსაფრთხოება და უფლებები დაცულია. ამის შესახებ კახა კალაძემ ყოფილი პრემიერ-მინისტრისთვის ახალი ბრალის წარდგენასთან დაკავშირებით დასმულ შეკითხვაზე განაცხადა.

როგორც მან განმარტა, ირაკლი ღარიბაშვილის მიერ წინა დღეებში გავრცელებული განცხადებები სავარაუდოდ პრევენციულ ხასიათს ატარებდა.

„ძალიან სამწუხაროა და არასასიამოვნოა, როდესაც ყოფილ თანაგუნდელზე გიწევს საუბარი. ჩვენ რამდენიმე დღის წინ ვიხილეთ მისი მხრიდან გაკეთებული ურთიერთგამომრიცხავი განცხადებები. სავარაუდოდ, მას ჰქონდა ინფორმაცია იმ სხვადასხვა საკითხზე, რომელზეც მიმდინარეობდა გამოძიება და ალბათ პრევენციული სახის განცხადება ჰქონდა. ყოფილი პოლიტიკოსები ზოგადად ხშირად იყენებენ აღნიშნულ მეთოდს და სამართლებრივი საკითხების პოლიტიკურ ჭრილში გადაყვანა ხდება ხოლმე. ძალიან მიჭირს ამაზე საუბარი. ის ჩვენი ყოფილი თანაგუნდელია. ერთი რამ შემიძლია გითხრათ: ქვეყანაში როგორც ირაკლი ღარიბაშვილის, ისე ყველა პატიმრის უსაფრთხოება და უფლებები არის დაცული“, - განაცხადა კახა კალაძემ.

საქართველოს პროკურატურამ განსაკუთრებით დიდი ოდენობით ქრთამის, წინასწარი შეთანხმებით ჯგუფის მიერ აღების ფაქტზე, საქართველოს ყოფილ პრემიერ-მინისტრ ირაკლი ღარიბაშვილს ახალი ბრალდება წარუდგინა.

საქმე თავდაცვის სამინისტროს სახელმწიფო შესყიდვებიდან მიღებულ 750,000 ლარის ქრთამს უკავშირდება, რომელიც პროკურატურის ინფორმაციით მაშინდელ პრემიერ-მინისტრამდე, ირაკლი ღარიბაშვილამდე თავდაცვის მინისტრის, ჯუანშერ ბურჭულაძის გავლით მივიდა. ამჟამად ირაკლი ღარიბაშვილი საპროცესო შეთანხმების საფუძველზე საპატიმროში 5-წლიან მსჯავრს იხდის, ახალი ბრალი კი 11-დან 15 წლამდე პატიმრობას ითვალისწინებს.