Eagle Hills-ისთვის უზურფუქტით გადაცემულ 6.3 მილიონ კვადრატულ მეტრზე განაშენიანების გეგმის შემუშავება იწყება
თბილისის Eagle Hills-ის, ანუ Tbilisi Waterfront-ის პროექტზე განაშენიანების გეგმის შემუშავების პროცესი დაიწყო - ამის შესახებ აღნიშნულია გარდაბნის მუნიციპალიტეტის მერიის მიერ გამოქვეყნებულ განცხადებაში. პროექტის მნიშვნელოვანი ნაწილი სწორედ გარდაბნის საზღვრებში - სოფლებში ყარაჯალარში, აღთაკლიაში, ფონიჭალასა და კრწანისში მდებარეობს.
საქართველოს მთავრობამ "იგლ ჰილს საქართველოს" 6 335 813 კვადრატული მეტრის მიწის ნაკვეთები პროექტის განხორციელებისთვის 2026 წლის აპრილში 2-წლიანი უზურფუქტის უფლებით გადასცა, რაც თავის თავში მოიაზრებს ტერიტორიის განვითარების უფლებას თუმცა, მიწის მესაკუთრედ კვლავ სახელმწიფო ნარჩუნდება.
მთავრობამ ტერიტორიის განაშენიანების სპეციალური რეჟიმით რეგულირების შესახებ დადგენილება 2026 წლის 29 მაისს გამოსცა და ქალაქ თბილისისა და გარდაბნის მუნიციპალიტეტების ტერიტორიის ნაწილის განსაკუთრებული რეგულირების ტერიტორიის სტატუსი მიანიჭა.
„ქალაქ თბილისისა და გარდაბნის მუნიციპალიტეტების ტერიტორიის ნაწილისათვის განსაკუთრებული რეგულირების ტერიტორიის სტატუსის მინიჭების თაობაზე“ საქართველოს მთავრობის 2026 წლის №234 დადგენილებით (შემდგომში - №234 დადგენილება) მინიჭებული განსაკუთრებული რეგულირების ტერიტორიის ფარგლებში, კერძო ინიციატივის საფუძველზე იწყება ქალაქ თბილისისა და გარდაბნის მუნიციპალიტეტების ტერიტორიაზე, კრწანისის ტყე-პარკში, განაშენიანების გეგმის შემუშავება.საპროექტო არეალი, რომლის ფართობიც 6 335 813.3 კვადრატულ მეტრს შეადგენს, კრწანისის ტყე-პარკში, მტკვრის ორივე მხარეს მდებარეობს და უშუალოდ უკავშირდება S4 საერთაშორისო სატრანსპორტო დერეფანს.პროექტის მთავარი ამოცანაა კრწანისის ტყე-პარკის ტერიტორიაზე მაღალი ხარისხის, მყუდრო, ბუნებასთან მაქსიმალურად ინტეგრირებული, დაბალი ინტენსივობისა და სიმჭიდროვის განაშენიანების განვითარება, რომლის უმეტესი წილი დაეთმობა ინდივიდუალურ განაშენიანებას - „ვილებისა“ და „თაუნჰაუსების“ სახით, ხოლო მცირე ნაწილი, განაშენიანების ცენტრი თავს მოუყრის საზოგადოებრივი და სოციალური ინფრასტრუქტურის ობიექტებს,"- ნათქვამია გარდაბნის მუნიციპალიტეტის მერიის მიერ გამოქვეყნებულ განცხადებაში.