ექიმი გიორგი ჩახუნაშვილი სასამართლო დარბაზიდან გათავისუფლდა

ექიმი გიორგი ჩახუნაშვილი, რომელიც 4 ოქტომბრის საპროტესტო აქციაში მონაწილეობის საქმეზე 19 ივნისს დააკავეს, დღეს სასამართლო დარბაზიდან გათავისუფლდა.

საპროცესო შეთანხმების მიხედვით, მან ჩადენილი დანაშაული აღიარა და 3 წლის, 3 თვისა და 2 დღის ვადით თავისუფლების აღკვეთა მიესაჯა, საიდანაც 3 წელი პირობითი სასჯელია.

გიორგი ჩახუნაშვილთან ერთად, საპროცესო შეთანხმება გაუფორმდა ზაქრო ალბუთაშვილსაც. მან აღიარა ჩადენილი დანაშაული და 4 წლით თავისუფლების აღკვეთა მიესაჯა, საიდანაც 1 წელი რეალური სასჯელია, ხოლო 3 წელი პირობითი.

"პირველ რიგში, დიდი მადლობა ყველა ჩემს მხარდამჭერს, ვინც იყო ქართული საზოგადოებიდან, თუ უცხოეთიდან. ჩემს იქ ყოფნას ყველა განიცდიდა. ნამდვილად არ ველოდებოდი დღეს ჩემს გათავისუფლებას, ამიტომ, აუცილებლად მინდა, მოკითხვა შევუთვალო გლდანის ციხეში - D3 - ჩემი საცხოვრებელი ადგილი, სადაც ვიყავი - ყველას. ყველა მინდა გავამხნევო, ვინც ციხეშია, ასაკის, სქესის მიუხედავად, ვინ, როდის, რისთვის მოხვდა.

მინდა, აუცილებლად დიდი მადლობა გადავუხადო ჩემს ადვოკატებს, რომლებმაც იშრომეს ძალიან ბევრი, ჩემს დარწმუნებაშიც სხვათა შორის. ჩემს ოჯახს დიდი მადლობა,რომელიც მხარში მედგა თითქმის სამი თვის განმავლობაში. ყველაფერი იქნება კარგად კი არა, ძალიან კარგად", - განაცხადა სასამართლოსთან ჩახუნაშვილმა.

გიორგი ჩახუნაშვილს სახელმწიფო ჯგუფურად ჩადენილი სტრატეგიული და განსაკუთრებული მნიშვნელობის ობიექტის ხელში ჩაგდების მცდელობას და ჯგუფურ ძალადობაში მონაწილეობას ედავება. მასთან და ალბუთაშვილთან ერთად 19 ივნისს 5-5 წლით პატიმრობა დავით ჟღენტს, კონსტანტინე კოკაიას, კახაბერ მჟავანაძესა და დავით სტურუას მიესაჯათ.