ეს კატასტროფაა... რის საფუძველზე ამბობენ, რომ სახელმწიფო კერძოზე უკეთესი იქნება? - ტრაპაიძე გზების მოვლის სახელმწიფო კომპანიაზე
კერძო სექტორს გზების მოვლა-შენახვის მიზნით ახალი სახელმწიფო კომპანიის დაფუძნებასთან დაკავშირებით არაერთი შეკითხვა აქვს.
როგორც საკითხის შეფასებისას ინფრასტრუქტურის მშენებელი კომპანიის "კავკასუს როუდ პროჯექტის" მმართველმა პარტნიორმა BMG-ის განუცხადა, ჩნდება კითხვა, რის საფუძველზე დაასკვნა ხელისუფლებამ, რომ აღნიშნულ ფუნქციას სახელმწიფო ბიზნესზე უკეთ შეასრულებს.
პაატა ტრაპაიძე აღნიშნავს, რომ მსგავსი მიდგომა ეკონომიკის საბაზრო პრინციპებს ეწინააღმდეგება.
“ეს იქნება პირდაპირი კოლაფსი, კატასტროფა, კონკურენცია შეუძლებელია [სახელმწიფო კომპანიასთან]. ჩვენ [ბიზნესი] რატომ ვერ ვუწევთ კონკურენციას ჩინურ სახელმწიფო კომპანიას? ის წააგებს თუ მოიგებს სულ ერთია, მაინც სახელმწიფო იზარალებს ან მოიგებს. თუ სახელმწიფო კომპანიის მიერ [გზების] მოვლა-შენახვაზეა საუბარი, მაშინ მშენებლობაზე და პროექტირებაზეც გადავიდეს სახელმწიფო. საერთოდ რატომ დავანგრიეთ საბჭოთა კავშირი, თუ კარგი იყო?
მეორე - იქნებ ვინმემ დადოს ანალიზი, რატომ იქნება ეს [სახელმწიფო] კომპანია კერძოზე უკეთესი. დღეს გვეუბნებიან, რომ სახელმწიფო უკეთ გააკეთებს, რის საფუძველზე, რომელ თეორიაზე დაყრდნობით ამბობენ ამას?
მესამე - ყოფილი ხელისუფლების დროს შექმნეს სახელმწიფო სამშენებლო კომპანია, რომელიც [არსებულმა მთავრობამ] 2014 თუ 2015 წელს დახურა. ისმის კითხვა - რატომ? ხომ უნდა გავარკვიოთ ერთხელ და სამუდამოდ, მივდივართ საბაზრო ეკონომიკისკენ თუ დირექტიული ეკონომიკისკენ?”, - განაცხადა პაატა ტრაპაიძემ.
ცნობისთვის, საქართველოს მთავრობა საერთაშორისო და შიდასახელმწიფოებრივი მნიშვნელობის გზების მოვლა-შენახვის მიზნით ახალი სახელმწიფო კომპანიის დაფუძნებას გეგმავს. აქამდე აღნიშნულ ფუნქციას ტენდერების მეშვეობით გამოვლენილი კერძო კონტრაქტორები ასრულებდნენ, თუმცა ინფრასტრუქტურის სამინისტროს საავტომობილო გზების დეპარტამენტის მიერ მომზადებული კანონპროექტის თანახმად, აღნიშნულ ფუნქციას სპეციალურად ამ მიზნისთვის დაფუძნებული სახელმწიფო კომპანია გადაიბარებს. პირველ ეტაპზე კომპანია გორი-არგვეთას 105-კილომეტრიან საერთაშორისო მნიშვნელობის მაგისტრალის მოვლა-შენახვის და მართვის სამუშაოებს განახორციელებს.