EU-ს სანქციების სიაში მოხვედრის შემდეგ, არკადი დვორკოვიჩმა FIDE-ს პრეზიდენტის პოსტი დატოვა

რუსეთის წარმომადგენელი და საერთაშორისო საჭადრაკო ფედერაციის (FIDE) პრეზიდენტი არკადი დვორკოვიჩი აცხადებს, რომ ევროკავშირის სანქციების სიაში მოხვედრის შემდეგ ორგანიზაციაში საქმიანობას აჩერებს.

ცნობისთვის, ევროკავშირმა, რუსეთის მიერ 2022 წელს უკრაინაში დაწყებული სრულმასშტაბიანი ომის გამო, სანქციების 21-ე პაკეტი დაამტკიცა. ახალი შეზღუდვები 170 ორგანიზაციასა და 48 ფიზიკურ პირს შეეხო. სანქციები შეიძლება მოიცავდეს აქტივების გაყინვას, მოგზაურობისა და ფინანსური ტრანზაქციების აკრძალვას.

FIDE-ის ოფიციალურ ვებგვერდზე გავრცელებულ განცხადებაში დვორკოვიჩმა ევროკავშირის გადაწყვეტილება „უკანონოდ და უსამართლოდ“ შეაფასა და აღნიშნა, რომ მის გასაჩივრებას ყველა შესაძლო სამართლებრივი გზით შეეცდება.

„თუმცა, ვიდრე სასამართლო საბოლოო გადაწყვეტილებას არ მიიღებს და სანქციები არ გაუქმდება ან შეიცვლება, ამან შესაძლოა FIDE-ის სტაბილურ ფუნქციონირებას შეუშალოს ხელი. სწორედ ამიტომ, გადავწყვიტე, ნებაყოფლობით შევაჩერო FIDE-ის პრეზიდენტის უფლებამოსილების განხორციელება დაუყოვნებლივი ძალით,“ - განაცხადა დვორკოვიჩმა.

ფედერაციის ინფორმაციით, მისი მოვალეობის შემსრულებელი ინდოელი მოჭადრაკე, მსოფლიოს ყოფილი ჩემპიონი ვიშვანათან ანანდი იქნება.

არკადი დვორკოვიჩი, რომელიც რუსეთის ყოფილი ვიცე-პრემიერია, FIDE-ს 2018 წლიდან ხელმძღვანელობს. გასულ თვეს მან განაცხადა, რომ სექტემბერში, უზბეკეთის ქალაქ სამარყანდში დაგეგმილ საჭადრაკო ოლიმპიადის ფარგლებში FIDE-ის გენერალურ ასამბლეაზე პრეზიდენტის პოსტზე ხელახლა იყრის კენჭს.

ევროკავშირის სანქციების ახალ სიაში ასევე მოხვდა რუსეთის სპორტის მინისტრი და ქვეყნის ეროვნული ოლიმპიური კომიტეტის პრეზიდენტი მიხაილ დეგტიარიოვი, რომელიც აქტიურად ხელმძღვანელობდა რუსეთის ინიციატივას, რომ ქვეყნის ოლიმპიურ გუნდზე დაწესებული დისკვალიფიკაცია გაუქმებულიყო.