ევროკავშირი რუსეთის წინააღმდეგ ახალ სანქციებს ამზადებს

ევროკავშირი რუსეთის ფედერაციის წინააღმდეგ სანქციების 21-ე პაკეტზე მუშაობას იწყებს, რომლის ერთ-ერთი მთავარი სამიზნე მოსკოვის ე.წ. ჩრდილოვანი ფლოტი იქნება. საუბარია გაუმჭვირვალე მფლობელობის მქონე სანავთობო ტანკერების ქსელზე, რომელსაც კრემლი რუსული ნავთობის გადასაზიდად იყენებს.

ბრიუსელში მიიჩნევენ, რომ ამ სექტორზე ზეწოლის გაძლიერება კრემლის შემოსავლების მნიშვნელოვან წყაროს გადაკეტავს და ვლადიმირ პუტინს უკრაინის სამშვიდობო შეთანხმებაზე დათმობებისაკენ უბიძგებს. არსებული ინფორმაციით, შეზღუდვების ახალი პაკეტი, სავარაუდოდ, ივნისის ბოლოს ან ივლისის დასაწყისში დამტკიცდება.

როგორც ირკვევა, „ჩრდილოვანი ფლოტის“ გარდა, სანქციები რუსულ ბანკებს, ფინანსურ ინსტიტუტებსა და სამხედრო-სამრეწველო კომპანიებსაც შეეხება. სიაში მოხვდებიან ის ფირმებიც, რომლებიც უკრაინის ოკუპირებული ტერიტორიებიდან მოპარული მარცვლეულის რეალიზაციას ეწევიან.

მნიშვნელოვანია ითქვას, რომ უნგრეთის ყოფილი პრემიერ-მინისტრის, ვიქტორ ორბანის ხელისუფლების შეცვლის შემდეგ, ევროკავშირს იმ ზომების ამოქმედების შესაძლებლობა ეძლევა, რომლებიც აქამდე დაბლოკილი იყო. მათ შორისაა პერსონალური სანქციები რუსეთის მართლმადიდებელი ეკლესიის მაღალჩინოსნებისა და პატრიარქ კირილეს წინააღმდეგ. ამასთან, ევროკომისია განიხილავს რუსული გემებისთვის საზღვაო მომსახურების აკრძალვის იდეას, რასაც მანამდე მალტა და საბერძნეთი ეწინააღმდეგებოდნენ.

ევროკავშირის უმაღლესი წარმომადგენლის, კაია კალასის განმარტებით, უნგრეთში ჩატარებული არჩევნების შემდეგ სანქციების პროცესმა ახალი იმპულსი შეიძინა. ბრიუსელში მიიჩნევენ, რომ რუსეთის ეკონომიკა ომის დაწყების შემდეგ ყველაზე რთულ მდგომარეობაშია და ახლა ზეწოლის გაძლიერებისთვის საუკეთესო მომენტია.