ევროპის ცენტრალურმა ბანკმა საპროცენტო განაკვეთი 2.25%-მდე გაზარდა

ევროპის ცენტრალურმა ბანკმა ბოლო სამი წლის განმავლობაში საპროცენტო განაკვეთი პირველად გაზარდა. არსებული ინფორმაციით, მმართველმა საბჭომ დღეს გამართულ სხდომაზე საორიენტაციო დეპოზიტების განაკვეთი 2.25%-მდე ასწია.

პარალელურად, ცვლილებები სხვა ძირითად მაჩვენებლებსაც შეეხო. ბანკმა ძირითადი რეფინანსირების განაკვეთი 2.4%-მდე გაზარდა. ზღვრული სასესხო განაკვეთი კი 2.65%-მდე განსაზღვრა.

როგორც ევროპული მედია წერს, ეს ნაბიჯი ECB-ს მხრიდან მონეტარული პოლიტიკის გამკაცრებისკენ მკვეთრ შემობრუნებაზე მიანიშნებს.

რაც შეეხება მიზეზებს, როგორც ლაგარდის უწყებაში განმარტეს, მკაცრი ზომების მიღება ევროზონაში ინფლაციის ზრდამ გამოიწვია. ირანში მიმდინარე ომმა ენერგორესურსებზე ფასების 10.9%-იანი მატება განაპირობა. როგორც ირკვევა, ამ ფაქტორმა მაისში საერთო ინფლაცია 3.2%-მდე გაზარდა. ცნობისთვის, ეს მაჩვენებელი 2023 წლის სექტემბრის შემდეგ ყველაზე მაღალია.

ცნობისთვის, ევროპის ცენტრალურმა ბანკმა დეპოზიტების განაკვეთი ბოლოს 2023 წლის სექტემბერში გაზარდა. მაშინ პოსტპანდემიური ინფლაციური კრიზისის დასასტაბილურებლად მაჩვენებელმა მაქსიმალურ ნიშნულს, 4.0%-ს მიაღწია. ამის შემდეგ მონეტარული პოლიტიკის შემსუბუქების ციკლი დაიწყო და ეს პროცესი 2025 წლის განმავლობაშიც აქტიურად გრძელდებოდა.