ფასის ლარით გამოხატვის წესის დარღვევისთვის 27 პირი ₾27 000-ით დაჯარიმდა - შემოსავლების სამსახური
წელს ფასის ლარით გამოხატვის წესის დარღვევის 212 ფაქტი გამოვლინდა, 27 პირს ჯამში 27 000 ლარის ოდენობით ჯარიმა დაეკისრა. ამის შესახებ ინფორმაციას ფინანსთა სამინისტროს შემოსავლების სამსახური ავრცელებს.
უწყების ცნობით, საგადასახადო მონიტორინგის დეპარტამენტის თანამშრომლები ქვეყნის მასშტაბით ინტენსიურად ახორციელებენ მეწარმე სუბიექტების მიერ ქონების რეალიზაციისა და მომსახურების გაწევის შეთავაზებისას ფასის ლარით გამოხატვის წესის ადმინისტრირებას.
შემოსავლების სამსახურის ინფორმაციით, მიმდინარე წლის პირველი 7 თვის განმავლობაში გამოვლენილი 212 დარღვევიდან 185 პირის მიმართ სანქციის სახით გაფრთხილება იქნა გამოყენებული, ხოლო 27 პირს ფულადი ჯარიმა, ჯამში 27 000 ლარის ოდენობით, დაეკისრა.
ფინანსთა სამინისტროს შემოსავლების სამსახური მეწარმე სუბიექტებს კიდევ ერთხელ შეახსენებს, რომ „საქართველოს ეროვნული ბანკის შესახებ“ საქართველოს ორგანული კანონის თანახმად, საქართველოს ტერიტორიაზე ლარი გადახდის ერთადერთი კანონიერი საშუალებაა, გარდა თავისუფალი ინდუსტრიული ზონებისა, თავისუფალი ვაჭრობის პუნქტებისა ან/და ეროვნული ბანკის მიერ განსაზღვრული შემთხვევებისა.
შესაბამისად, უწყება მეწარმე სუბიექტებს მოუწოდებს, თავი შეიკავონ ფასის ლარით გამოხატვის წესების დარღვევისგან.
BM.GE
წყარო: bm.ge