Ford-ის შემდეგ მონაცემთა ცენტრებისთვის ახალი ბატარეების წარმოებას GM-იც იწყებს

ამერიკულმა ავტომწარმოებელმა General Motors-მა ენერგიის შენახვის სისტემებისა და მონაცემთა ცენტრების მხარდასაჭერად ახალი თაობის ნატრიუმ-იონური ბატარეების შექმნის გეგმა წარადგინა.

პროექტის ფარგლებში ავტომწარმოებელი კოლორადოს შტატში მომუშავე სტარტაპ Peak Energy-სთან ითანამშრომლებს. ბატარეების პირველი პარტია კი ბაზარზე 2028 წლის შემდეგ გამოჩნდება. კომპანიის ვიცე-პრეზიდენტის, კურტ კელტის განმარტებით, ახალი ტექნოლოგია საოპერაციო ხარჯებსა და სისტემურ სირთულეებს საგრძნობლად შეამცირებს.

აღსანიშნავია, რომ ავტომწარმოებელი მსგავსი მიმართულებით სხვა პარტნიორებთანაც აქტიურად თანამშრომლობს. კერძოდ, ის Redwood Materials-თან ერთად ელექტრომობილების ძველი ბატარეების მეორად გამოყენებაზე მუშაობს. პარალელურად, კომპანია LG Energy Solution-თან ერთობლივი საწარმოს მეშვეობით ლითიუმ-რკინა-ფოსფატის ელემენტების წარმოებასაც გეგმავს.

ამჟამად ერთობლივი საწარმო Ultium Cells-ი ოჰაიოსა და ტენესის ქარხნებში 90 გიგავატ-საათის სიმძლავრის საწარმოო მოცულობას ფლობს. აღსანიშნავია, რომ მიმდინარე წლის მარტში ტენესის საწარმოში ახალი ელემენტების გამოსაშვებად $70 მილიონის მოცულობის ინვესტიციაც განხორციელდა.

მნიშვნელოვანია ითქვას, რომ General Motors-ი არ არის ერთადერთი ამერიკული საავტომობილო გიგანტი, რომელიც ბატარეების ბაზარზე შევიდა. მისმა კონკურენტმა Ford Motor-მა რამდენიმე კვირის წინ კერძო მიმართულებაც კი ჩამოაყალიბა.

შეგახსენებთ, ავტოინდუსტრიის მოთამაშეები ბატარეებს ხელოვნურ ინტელექტზე მორგებული მონაცემთა ცენტრებისთვის ქმნიან. მათი დანიშნულება კი ენერგიის შენახვა და მისი უწყვეტად მიწოდების უზრუნველყოფაა.