გადაუხდელი საბანკო ვალის გამო, აღსრულების ბიურო თბილისში საფრანგეთის მოქალაქის კუთვნილ სასტუმროს ₾12.6 მილიონად ყიდის

გადაუხდელი საბანკო ვალის ფარგლებში, საქართველოს იუსტიციის სამინისტროს აღსრულების ეროვნული ბიურომ თბილისში მდებარე სასტუმრო კომპლექსი ელექტრონულ აუქციონზე გამოიტანა. მიმდინარე ვაჭრობის მონაცემებით, ქონების ფასი 12,622,840 ლარს შეადგენს.

აღსრულების ეროვნული ბიუროს ინფორმაციით, სარეალიზაციო ქონება მოიცავს სამ საკადასტრო ერთეულზე რეგისტრირებულ სასტუმრო კომპლექსს, რომელიც მდებარეობს თბილისში, ქურხულის ქუჩის №14-სა და №14ა-ში, ასევე ილიკო ქურხულის შესახვევის №1-ში. ქონების შეფასების ღირებულება 16 609 000 ლარია.

აუქციონის აღწერილობის მიხედვით, კომპლექსი შედგება ორი ურთიერთდაკავშირებული სასტუმროს შენობისა და ადმინისტრაციული შენობისგან. სასტუმროს აქვს ათეულობით ნომერი, საკონფერენციო დარბაზი, რესტორანი, საუზმის სივრცეები, სპა-ზონა აუზითა და საუნით, ტექნიკური და ადმინისტრაციული ფართები. კომპლექსი განთავსებულია 545, 310 და 43 კვადრატული მეტრის მიწის ნაკვეთებზე, ხოლო შენობა-ნაგებობების საერთო ფართობი დაახლოებით 3 835 კვადრატულ მეტრს აღემატება.

საჯარო რეესტრის მონაცემებით, ქონების მესაკუთრეა შპს „ატლას მენეჯმენტ გრუპი“. კომპანიის 100%-იანი წილის მფლობელი 2022 წლიდან არის საფრანგეთში რეგისტრირებული სააქციო საზოგადოება Manta Ray Group, რომლის საბოლოო მფლობელად რეესტრში საფრანგეთის მოქალაქე მარსელ ბენამუ არის მითითებული.

აღსრულების ეროვნული ბიუროს ინფორმაციით, აუქციონში მონაწილეობის მსურველებმა 830 450 ლარის ოდენობის საგარანტიო თანხა უნდა წარადგინონ. გამარჯვებული ვალდებული იქნება აუქციონის დასრულებიდან 10 კალენდარული დღის განმავლობაში გადაიხადოს შეძენილი ქონების სრული ღირებულება.

აუქციონის დოკუმენტაციის თანახმად, ქონება იპოთეკით არის დატვირთული და იპოთეკარი სს „თიბისი ბანკია“. აღსრულების ბიუროს მიერ გამოქვეყნებული ინფორმაციის მიხედვით, ბანკის მოთხოვნა სესხის ხელშეკრულებიდან გამომდინარე ვალდებულებას უკავშირდება. დაინტერესებულ პირებს აუქციონში მონაწილეობის მიღება 29 ივლისამდე შეეძლებათ.