ღარიბაშვილის დროინდელი 80 000-მდე განკარგულება ისევ არაა საჯარო|რა პასუხი აქვთ მთავრობაში?

ირაკლი ღარიბაშვილის პრემიერობის დროინდელი 80 000-მდე განკარგულება ისევ გამოუქვეყნებელია და შესაბამისად, საჯარო არაა.

მთავრობის განკარგულებები - ამ ბმულზე 2021-2023 წლებში გამოცემული განკარგულებები არ იძებნება

საქმე ის არის, რომ 3-წლიანი პაუზის შემდეგ, საქართველოს მთავრობამ, ირაკლი კობახიძის ხელმძღვანელობით, პირველი განკარგულება 2024 წლის თებერვალში გამოაქვეყნა. მაშინ მთავრობის ადმინისტრაციის პრესსამსახურში BMG-ის უთხრეს, რომ მიმდინარეობდა მუშაობა წინა წლების განკარგულებების გამოქვეყნებაზეც, მაგრამ ამ დრომდე ძველი განკარგულების გამოქვეყნება ირაკლი კობახიძის ადმინისტრაციას ამ დრომდე არ დაუწყია.

“განკარგულებები მუშავდება, საუბარია 80 ათასზე მეტ დოკუმენტზე, რის დამუშავებასაც დრო სჭირდება”, - უთხრეს BMG-ს მთავრობის პრესსამსახურში, როდესაც კიდევ ერთხელ მოვიკითხეთ, რატომ არ ქვეყნდება სამართლებრივი აქტები.

როდის დასრულდება დამუშავება და დაიწყება ატვირთვა, მთავრობის პრესსამსახურში ვერ აკონკრეტებენ.

2023 წელს მთავრობის თითქმის ყოველი მე-4 განკარგულება სახელმწიფო ქონების გადაცემას ეხებოდა - TI

შეგახსენებთ: ორგზის პრემიერი ირაკლი ღარიბაშვილი დღეს პატიმარია. ექს-პრემიერს ახალი ბრალი - დიდი ოდენობით ქრთამის აღება - რამდენიმე დღის წინ წარუდგინეს. პროკურატურის განცხადებით, მის საქმესთან დაკავშირებით თავდაცვის ყოფილმა მინისტრმა ჯუანშერ ბურჭულაძემ ითანამშრომლა. მუხლი, რომლითაც მას ბრალი წარუდგინეს, 11-დან 15 წლამდე თავისუფლების აღკვეთას ითვალისწინებს.

უკანონო შემოსავლები და კორუფცია - რა სასჯელს ითვალისწინებს ექსპრემიერისთვის წარდგენილი ბრალდებები?