Google-მა და SpaceX-მა ორბიტული მონაცემთა ცენტრების პროექტზე მოლაპარაკებები დაიწყეს

Alphabet-ის შვილობილმა კომპანია Google-მა ილონ მასკის SpaceX-თან Project Suncatcher-ის ფარგლებში თანამშრომლობის შესახებ მოლაპარაკებები დაიწყო.

პროექტი კოსმოსში მზის ენერგიაზე მომუშავე ორბიტული მონაცემთა ცენტრების განთავსებასა და მათ სამომავლო გაშვებას გულისხმობს. არსებული ინფორმაციით, ინიციატივა Tensor-ის პროცესორებით აღჭურვილი თანამგზავრების ქსელის შექმნას ითვალისწინებს. როგორც ირკვევა, Google-ი პირველი პროტოტიპის გაშვებას პარტნიორ Planet Labs-თან ერთად 2027 წლისთვის გეგმავს.

შეგახსენებთ, რომ SpaceX-ი ამჟამად საფონდო ბირჟაზე აქციების პირველადი განთავსებისთვის ემზადება. ორბიტული მონაცემთა ცენტრების განვითარება კი კომპანიისთვის სტრატეგიულად მნიშვნელოვანია, რადგან ის დიდ კაპიტალსა და ტექნოლოგიურ რესურსებს საჭიროებს.

საგულისხმოა, რომ Google-თან შესაძლო პარტნიორობა ილონ მასკისთვის ხელოვნური ინტელექტის სფეროში კონკურენტთან თანამშრომლობის მეორე შემთხვევაა. გასულ კვირას ანალოგიური ინტერესი Anthropic-მაც გამოხატა, რომელიც SpaceX-ის Colossus 1-ის გამოთვლითი სიმძლავრეების გამოყენებაზე შეთანხმდა. მნიშვნელოვანია ითქვას, რომ ეს პროექტი კოსმოსში მრავალგიგავატიანი მონაცემთა ცენტრების განვითარებას ისახავს მიზნად.