გზების დეპარტამენტის თავმჯდომარემ კომპანიებთან ზამთრის შემდგომ დაზიანებული გზების მოწესრიგების საკითხი განიხილა
საავტომობილო გზების დეპარტამენტის თავმჯდომარე, ლევან დარახველიძე, გზების მოვლა-შენახვის სამუშაოების კომპანიებს შეხვდა - ინფორმაციას ამის შესახებ თავად უწყება ავრცელებს.
პრესრელიზის თანახმად, შეხვედრაზე მხარეებმა გზებზე არსებული ვითარება და ზამთრის შემდგომ დაზიანებული გზების მოწესრიგების საკითხი განიხილეს.
"კომპანიებმა გზების მოვლა-შენახვის სამუშაოებთან დაკავშირებით თავიანთი წინადადებები წარმოადგინეს. დეპარტამენტის მხრიდან კი კონკრეტული დავალებები მიიღეს, რათა დაზიანებული გზის მონაკვეთები უმოკლეს ვადებში აღდგეს.
შეხვედრაზე ასევე ისაუბრეს მოვლა-შენახვის სისტემის გაძლიერებაზე და ახალი ინოვაციური მიდგომების დანერგვაზე, რათა ეფექტიანად მოხდეს მკაცრი ზამთრისა და სტიქიური მოვლენების პირობებში, საავტომობილო გზებზე ავტოტრანსპორტის უსაფრთხო და შეუფერხებელი გადაადგილების უზრუნველყოფა", - ნათქვამია გავრცელებულ ინფორმაციაში.
გზების დეპარტამენტის ცნობით, შეხვედრას თავმჯდომარის მოადგილე, გიორგი ორმოცაძე და დეპარტამენტის შესაბამისი სამსახურის წარმომადგენლებიც ესწრებოდნენ.
BM.GE
წყარო: bm.ge