„იდენტიფიცირებულ საფრთხის ზონებშიც კი მშენებლობები გრძელდება“ - როგორ უნდა მოვახერხოთ სტიქიების პრევენცია?
თელავში განვითარებულმა სტიქიამ კიდევ ერთხელ აჩვენა, რომ კლიმატის ცვლილების ფონზე ექსტრემალური მოვლენები სულ უფრო ხშირი და ინტენსიური ხდება.
სპეციალისტების შეფასებით, მსგავსი რისკების შემცირება მხოლოდ სტიქიის შემდეგ ზარალის ლიკვიდაციით ვერ მოხდება, აუცილებელია საფრთხეების დეტალური შესწავლა, ქალაქების სწორი დაგეგმარება და პროგნოზზე დაფუძნებული ადრეული შეტყობინების სისტემების დანერგვა.
გადაცემა „საქმიანი დილის“ ეთერში დედამიწის შემსწავლელი ინსტიტუტის გეოგრაფიის დეპარტამენტის უფროსმა ლაშა სუხიშვილმა კიდევ ერთხელ ისაუბრა საფრთხის შემცველ ზონებში არსებულ მშენებლობებზე და გადაწყვეტილების მიმღებ პირებს მეტი პასუხისმგებლობისკენ მოუწოდა.
„უნდა მოხდეს დეტალური შესწავლა, რამ გამოიწვია კავკასიონის ქუჩაზე არხიდან წყლის ნაკადის გადმოსვლა. პარალელურად, აუცილებელია პრევენციული ღონისძიებების გატარება, რაც გულისხმობს როგორც ქალაქის სწორ დაგეგმარებას, ისე პროგნოზზე დაფუძნებული ადრეული შეტყობინების სისტემის შექმნას.
პროგნოზირებად სისტემას განსაკუთრებული მნიშვნელობა აქვს, რადგან მდინარე თელავისხევი მცირე ზომისაა. სტიქიური პროცესის ჩამოყალიბებიდან თელავამდე მანძილი ძალიან მოკლეა, შესაბამისად, რეაგირებისთვის ხელმისაწვდომი დროც შეზღუდულია. სწორედ ამიტომ, ადრეული შეტყობინების სისტემა უნდა ეფუძნებოდეს კონკრეტულ პარამეტრებს, მაგალითად, ნალექის ინტენსივობას, წყლის დონის ცვლილებასა და წყალშემკრებ აუზში წყლის მობილიზების მაჩვენებლებს. ასეთ სისტემას შესაძლოა ზოგჯერ ცრუ განგაშიც ჰქონდეს, თუმცა უსაფრთხოების თვალსაზრისით ეს მისაღებია, რადგან საბოლოოდ ადამიანების სიცოცხლის დაცვას ემსახურება.
ამ შემთხვევაში დადებითი გარემოება იყო ის, რომ სტიქია გამთენიისას განვითარდა, როდესაც ქუჩებში ადამიანებისა და ტრანსპორტის მოძრაობა მინიმალურია. სავარაუდოდ, სწორედ ამან განაპირობა ისიც, რომ მსხვერპლი არ ყოფილა. თუმცა მსგავსი მოვლენები შეიძლება დღისითაც განვითარდეს, როდესაც ქალაქში გადაადგილება ინტენსიურია. ამიტომ ასეთ რისკებზე ყურადღების გამახვილება და შესაბამისი პრევენციული ზომების მიღება განსაკუთრებით მნიშვნელოვანია.