ირანმა ბაჰრეინში Amazon-ის მონაცემთა ცენტრი დაბომბა

ირანის ისლამური რევოლუციის გუშაგთა კორპუსმა ბაჰრეინში მდებარე Amazon-ის მონაცემთა ცენტრების ინფრასტრუქტურაზე ფრთოსანი რაკეტებით იერიში მიიტანა. ირანული სამთავრობო მედია Fars-ის თანახმად, მიზანში ამოღებული ობიექტი სრულად განადგურდა, თუმცა ამერიკული არხები და თავად Amazon-ის წარმომადგენლობა ამ ცნობას არ ადასტურებენ.

აღსანიშნი ფაქტია, რომ ამერიკული ტექნოლოგიური გიგანტები კონფლიქტის ეპიცენტრში მანამდეც აღმოჩნდნენ. მარტში არაბთა გაერთიანებულ საამიროებში AWS-ის მონაცემთა ცენტრებზე დრონების განხორციელებულმა იერიშმა ციფრული სერვისების შეფერხება გლობალურად გამოიწვია, აპრილში კი ირანულმა მხარემ Nvidia-ს, Apple-ის, Microsoft-ისა და Google-ის ობიექტები თავდასხმის შესაძლო სამიზნეებად გამოაცხადა.

შეგახსენებთ, აშშ-სა და ირანს შორის დაპირისპირება პრეზიდენტ დონალდ ტრამპის მიერ ცეცხლის შეწყვეტის შეთანხმების დასრულებულად გამოცხადების შემდეგ გამწვავდა. ამ ნაბიჯის შემდეგ ამერიკის შეერთებული შტატების ცენტრალურმა სარდლობამ ირანის სამხედრო ობიექტებზე იერიშები 10 ღამის განმავლობაში განახორციელა. უწყების განმარტებით, სამხედრო კამპანია მიზნად ჰორმუზის სრუტეში კომერციულ გემებზე თავდასხმის პოტენციალის განადგურებას ისახავს.