ირანში ომის მიუხედავად, Zara-ს მფლობელი Inditex-ის მოგება 5%-ით გაიზარდა

Zara-ს მფლობელმა ესპანურმა მოდის გიგანტმა, Inditex-მა, პირველ კვარტალში 1.4 მილიარდი ევროს წმინდა მოგება დააფიქსირა, რაც წინა წელთან შედარებით 5.4%-იანი ზრდაა და ბაზრის მოლოდინებს აღემატება.

გაყიდვები 5.8%-ით - ან 8.8%-ით მუდმივი გაცვლითი კურსით - 8.7 მილიარდ ევრომდე გაიზარდა, რაც ანალიტიკოსების მიერ ნავარაუდევ დაახლოებით 8%-იან ზრდაზე მაღალი მაჩვენებელია.

მოგების მარჟის გაუმჯობესების წყალობით, მთლიანი მოგება 6.9%-ით, 5.4 მილიარდ ევრომდე გაიზარდა. ეს ნიშნავს, რომ კომპანიამ შემოსავლების უფრო დიდი ნაწილი მოგების სახით შეინარჩუნა. EBITDA (მოგება პროცენტების, გადასახადების, ცვეთისა და ამორტიზაციის დაქვითვამდე) 7.3%-ით, 2.6 მილიარდ ევრომდე გაიზარდა.

Inditex-ის აქციების ფასმა 5%-ზე მეტით მოიმატა მას შემდეგ, რაც კომპანიამ მეორე კვარტალის ძლიერი დასაწყისის შესახებ განაცხადა. 1-ელი მაისიდან 1-ელ ივნისამდე პერიოდში გაყიდვები 11.5%-ით გაიზარდა, რამაც დაამშვიდა ინვესტორები, რომ მომხმარებელთა დანახარჯების შესუსტების ნიშნების მიუხედავად, Zara-ს მფლობელი მდგრადობას ინარჩუნებს.

"Inditex-მა შეინარჩუნა ძლიერი იმპულსი, მისმა უახლესმა შედეგებმა პირველი კვარტლის მოლოდინებს გადააჭარბა. ასევე დაფიქსირდა მეორე კვარტლის ძლიერი სტარტი, რადგან გაყიდვები დაახლოებით იმავე ტემპით გაიზარდა, როგორითაც კომპანიამ წინა კვარტალი დაასრულა", - განაცხადა მამტა ვალეჩამ, Quilter Cheviot-ის ანალიტიკოსმა.

მსოფლიოში ერთ-ერთი ყველაზე დიდი საჯარო ტანსაცმლის რითეილერის შემოსავლების ეს ნახტომი ზაფხულის მოახლოებასთან ერთად მომხმარებელთა სტაბილურ მადაზე მიუთითებს. ეს ხდება იმ შიშების ფონზე, რომ უფრო გაურკვეველი ეკონომიკური და გეოპოლიტიკური ფონი შესაძლოა მომდევნო თვეებში ხარჯებზე უარყოფითად აისახოს. ბიზნესები მთელ მსოფლიოში გლობალური ეკონომიკის მზარდ გაურკვევლობას და მომხმარებლების მიერ ხარჯების პოტენციურ შემცირებასთან დაკავშირებულ შიშებს უმკლავდებიან.

Inditex-ის განცხადებით, მისი მიწოდების ფართო ჯაჭვი და მოქნილი სატრანსპორტო ქსელი დაეხმარა კომპანიას, ბოლოდროინდელი შეფერხებების მიუხედავად, მსოფლიოს მასშტაბით მაღაზიებში პროდუქციის უწყვეტი მიწოდება შეენარჩუნებინა.

"საბოლოო ჯამში, Inditex ინარჩუნებს მედეგ ბიზნესმოდელს, რომელსაც შეუძლია მნიშვნელოვან ეკონომიკურ ზეწოლას და ვალუტის კურსების რყევებს გაუძლოს", - აღნიშნა მამტა ვალეჩამ.

ვალეჩას თქმით, მომხმარებელთა ძლიერმა მოთხოვნამ და კომპანიის უნარმა, მოიპოვოს პროდუქცია ძირითად ბაზრებთან ახლოს, მას კოლექციების მუდმივად განახლებაში დაეხმარა, თანაც ისე, რომ ფასდაკლებების საჭიროება მინიმუმამდე დაეყვანა.

Inditex-მა ასევე აღნიშნა, რომ მიმდინარე "გეოპოლიტიკურმა გამოწვევებმა" გავლენა მოახდინა გაყიდვებზე ახლო აღმოსავლეთში - რეგიონში, რომელზეც Barclays-ის შეფასებით, კომპანიის შემოსავლების დაახლოებით 5% მოდის.

კომპანიამ ასევე განაცხადა, რომ რეგიონში მიმდინარე არასტაბილურობამ შესაძლოა მის მომდევნო თვეების შედეგებზეც იმოქმედოს.

Inditex-ი რიგი სხვა გამოწვევების წინაშეც დგას, მათ შორის გაზრდილი გადაზიდვის ხარჯები და ისეთ ნედლეულზე ფასების მატებაა, როგორებიც ბამბა და პოლიესტერია. მოსალოდნელია, რომ წელს კომპანიის შედეგებზე უარყოფით გავლენას ვალუტის კურსების რყევებიც მოახდენს.

Inditex-მა კვარტალი 5 456 მაღაზიით დაასრულა.

წლის ძლიერი სტარტის მიუხედავად, Inditex-მა თავისი პროგნოზები უცვლელი დატოვა. კომპანია ელის, რომ გაყიდვების ზრდა მეორე კვარტალშიც გაგრძელდება, რასაც ხელს საგაზაფხულო და საზაფხულო კოლექციებზე ძლიერი მოთხოვნა, ასევე მაღაზიებისა და ოპერაციების მუდმივი გაუმჯობესება შეუწყობს.