იურიდიულ საკითხთა კომიტეტმა მთავრობის საპარლამენტო მდივნის მოადგილის თანამდებობის გაუქმებას მხარი დაუჭირა
იურიდიულ საკითხთა კომიტეტმა „საპარლამენტო მდივნის შესახებ“ კანონში ცვლილებას პირველი მოსმენით მხარი დაუჭირა.
კანონპროექტის თანახმად, უქმდება საქართველოს მთავრობის საპარლამენტო მდივნის მოადგილის თანამდებობა.
ინიციატივა მთავრობის საპარლამენტო მდივანმა ვახტანგ ბაჩიაშვილმა წარადგინა, მისი განმარტებით, არსებული მდგომარეობის მიხედვით, მთავრობის საპარლამენტო მდივანს ჰყავს მოადგილე, რომლის ფუნქციებიც არ არის დაკონკრეტებული.
ინიციატივის განმარტებითი ბარათის თანახმად, „საპარლამენტო მდივნის შესახებ“ საქართველოს კანონით, მთავრობის საპარლამენტო მდივნის საქმიანობას უზრუნველყოფს საქართველოს მთავრობის ადმინისტრაციის უფლებამოსილი სტრუქტურული ერთეული - პარლამენტთან და პრეზიდენტთან ურთიერთობის დეპარტამენტი, რომლის ძირითად ამოცანათაგან ერთ-ერთი უპირველესი მთავრობის საპარლამენტო მდივნისათვის კანონით განსაზღვრული უფლებამოსილებების განხორციელების ხელშეწყობაა.
შესაბამისად, მოადგილის პოსტით იქმნება ფუნქციების დუბლირება, რომელიც მიზანშეწონილია რომ აღმოფხვრილი იყოს.
„აქედან გამომდინარე, საპარლამენტო მდივნის მოადგილის დამატებითი რგოლის საჭიროება აღარ არსებობს. შესაბამისად, ვფიქრობთ, რომ ამ ცვლილებით მნიშვნელოვნად დაიზოგება წლიური ბიუჯეტი მთავრობის ადმინისტრაციის საშტატო ნუსხისთვის“, - აღნიშნა ვახტანგ ბაჩიაშვილმა.
BM.GE
წყარო: bm.ge