კობახიძის თქმით, მშობლებთან შეხვედრაზე დიუშენის მედიკამენტებზე შეჯერდნენ, რომლის შესყიდვაზე მუშაობაც დაიწყება
შეიქმნება სამუშაო ჯგუფი, რომელიც [დიუშენის] მედიკამენტების უზრუნველყოფის საკითხზე იმუშავებს - ამის შესახებ ირაკლი კობახიძემ დღეს 4 ივნისს დიუშენის კუნთოვანი დისტროფიის მქონე ბავშვების მშობლებთან შეხვედრის შემდეგ განაცხადა.
„კონკრეტული მედიკამენტების შესყიდვის შესახებ საბოლოო გადაწყვეტილება მიიღება სხვადასხვა ფაქტორის, მათ შორის ფარმაცევტული კომპანიების მიერ შემოთავაზებული პირობების გათვალისწინებით. შეიქმნება საგანგებო სამუშაო ჯგუფი, დაიწყება სამუშაო პროცესი და მშობლები მუდმივ რეჟიმში მიიღებენ ინფორმაციას პროცესების მიმდინარეობასთან დაკავშირებით.
ჩვენ შევჯერდით კონკრეტულ მედიკამენტებზე, რომლებსაც კონკრეტული მიზეზების გამო ახლა არ ვასახელებთ, თუმცა მშობლების სრულ წრეს ამაზე ექნება სათანადო ინფორმაცია. მადლობა მინდა გადავუხადო შეხვედრაში მონაწილე თითოეულ მშობელს, ისევე, როგორც ყველა მშობელს, კონსტრუქციული დამოკიდებულებისთვის. მადლობა მინდა გადავუხადო საქართველოს ჯანდაცვის მინისტრს და სამინისტროს შესაბამის თანამშრომლებს საკითხის სიღრმისეული დამუშავებისთვის. ჩვენ გამოვთქვამთ იმედს, რომ დღევანდელი გადაწყვეტილება შექმნის საუკეთესო საფუძველს ბავშვების ინტერესების დაცვისა და რეალიზებისათვის“, - განაცხადა ირაკლი კობახიძემ.
შეხვედრის დასრულების შემდეგ, მშობლებმა, რომლებიც თითქმის ორი თვეა კანცელარიასთან ღამეს მორიგეობით ათენებენ თქვეს, რომ ეს არის ბავშვების გამარჯვება და მედიკამენტები საქართველოში თვე ნახევრიდან ორი თვის ვადაში იქნება.
BM.GE
წყარო: bm.ge