
კრასნოდარის მხარეში ორ ნავთობქარხანას დრონებით შეუტიეს
17-18 ნოემბრის ღამეს რუსეთის სამხრეთით, კრასნოდარის მხარეში მდებარე ილსკისა და აფიპსკის ნავთობგადასამუშავებელ ქარხნებს დრონებით შეუტიეს.
უკრაინული მონიტორინგის Telegram-არხ Exilenova+-ის ცნობით, დარტყმა ორივე ობიექტზე განხორციელდა, მთლიანობაში კრასნოდარის მხარეზე კი იერიში მთელი ღამის განმავლობაში გრძელდებოდა.
რუსული გამოცემა Astra-ს ინფორმაციით, შეტევას, რომელიც 04:40 საათზე დაიწყო, ქარხნების მიმდებარედ აფეთქებები და საჰაერო თავდაცვის სისტემების ამოქმედება მოჰყვა.
აღსანიშნავია, რომ რუსეთის სანავთობო ინფრასტრუქტურაზე შეტევები უკრაინის ფართომასშტაბიანი კამპანიის ნაწილია. ამ ნაბიჯებით კიევი რუსეთის არმიისთვის საწვავის მიწოდების შეფერხებასა და ომის დასაფინანსებელი შემოსავლების შემცირებას ცდილობს.
რაც შეეხება თავად ობიექტებს, კრასნოდარის მხარის სევერსკის რაიონში მდებარე ორივე საწარმო სამხრეთ რუსეთის უმსხვილეს ნავთობქარხნებს შორისაა. კერძოდ, აფიპსკის ქარხნის წლიური სიმძლავრე დაახლოებით 6.25 მილიონ ტონა ნავთობს შეადგენს, ილსკის ქარხნისა კი - 6.6 მილიონ ტონას.
ამ ორ ქარხანაზე უკრაინული დრონებით შეტევები აქამდეც არაერთხელ განხორციელდა. კერძოდ, უკრაინის გენერალური შტაბის ინფორმაციით, ილსკის ქარხნის გადასამუშავებელ დანადგარებსა და ბენზინის საწარმოო კომპლექსს ბოლოს 16 ნოემბერს დაარტყეს, აფიპსკის ქარხანაზე კი იერიში 6 ნოემბერს მიიტანეს.
BM.GE
წყარო: bm.ge