კრემლი პუტინის, ტრამპისა და სი ძინპინის სამმხრივი შეხვედრის ორგანიზებაზე მუშაობს
რუსეთის პრეზიდენტ ვლადიმირ პუტინს, აშშ-ის პრეზიდენტ დონალდ ტრამპსა და ჩინეთის ლიდერ სი ძინპინს შორის სამმხრივი შეხვედრის მოსამზადებლად მოლაპარაკებები აქტიურად მიმდინარეობს.
როგორც ირკვევა, ლიდერების აუდიენცია ჩინეთის ქალაქ შენჯენში, APEC-ის სამიტის ფარგლებში გაიმართება. კრემლის პრესსპიკერის, დიმიტრი პესკოვის განცხადებით, მხარეებს შორის არსებობს საერთო თანხმობა, რომ მსგავსი დიალოგი დროული და მეტად სასარგებლო იქნება.
მოსკოვში იმედოვნებენ, რომ პროცესის კოორდინაცია უახლოეს დღეებში დასრულდება. აღსანიშნია, რომ პუტინმა ამ ინიციატივას საჯარო მხარდაჭერა უკვე გამოუცხადა და განმარტა, რომ საბოლოო გადაწყვეტილებას დიდწილად მასპინძელი ჩინეთის პოზიცია განსაზღვრავს.
რაც შეეხება ტრამპის პოზიციას, მან თქვა, რომ რუსეთისა და ჩინეთის ლიდერებთან შეხვედრას მხოლოდ ბირთვული განიარაღების საკითხზე სამსჯელოდ გეგმავს.
BM.GE
წყარო: bm.ge