MDF-მა კომპანია „მეტრიკს“ გურჯაანის მულტიფუნქციური კომპლექსის პროექტირების მომსახურების ხელშეკრულება შეუწყვიტა
ინფრასტრუქტურის სამინისტროს მუნიციპალური განვითარების ფონდმა გურჯაანის მულტიფუნქციური კომპლექსის პროექტირების მომსახურებაზე არქიტექტურულ ბიურო "მეტრიკთან" გაფორმებული ხელშეკრულება შეწყვიტა.
მუნიციპალურ განვითარების ფონდში განმარტავენ, რომ ბიურომ პროექტირებაზე კონკურსში გასული წლის მიწურულს გაიმარჯვა და მიუხედავად ფონდის მხრიდან არაერთი სამუშაო შეხვედრის, სიტყვიერი და წერილობითი გაფრთხილებისა, კომპანიამ ვერ უზრუნველყო საჭირო პროგრესისა და შედეგის მიღწევა, რის გამოც ფონდმა ხელშეკრულება შეწყვიტა.
"პროექტის მნიშვნელობიდან და მისი დროულად განხორციელების აუცილებლობიდან გამომდინარე, მუნიციპალური განვითარების ფონდმა მიიღო გადაწყვეტილება საპროექტო მომსახურების ხელშეკრულება, განმეორებითი კონკურსის გამოცხადების გარეშე, გააფორმოს იმ კომპანიასთან, რომელიც ამჟამად ახორციელებს მსგავსი ტიპის მულტიფუნქციური კომპლექსის პროექტს. ფონდსა და აღნიშნულ კომპანიას შორის გაფორმებული ხელშეკრულება ითვალისწინებს ერთი ძირითადი და ხუთ სხვადასხვა ლოკაციაზე მორგებული (მიბმის) საპროექტო გადაწყვეტის მომზადებას. აღნიშნული გადაწყვეტილება უზრუნველყოფს პროექტირების პროცესის უწყვეტობას, მაღალი ხარისხის სტანდარტების დაცვასა და სამუშაოების ოპერატიულად გაგრძელებას", - აცხადებენ მუნიციპალური განვითარების ფონდში, თუმცა კომპანია, რომელიც პროექტირებას მოახდენს ჯერ შერჩეული არ არის.
საპროექტო დოკუმენტაციის მიხედვით, გურჯაანში დაგეგმილია 1 000 მაყურებელზე გათვლილი მულტიფუნქციური კომპლექსის მშენებლობა, რომელიც გააერთიანებს დიდ და საბავშვო საცურაო აუზებს, სატრენაჟორო და ფიტნეს სივრცეებს, ასევე დარბაზებს სპორტის სხვადასხვა სახეობისთვის. კომპლექსი ასევე მოიცავს მედიათეკას, ქორეოგრაფიის, სახელოვნებო, ფოლკლორისა და უცხო ენების სივრცეებს, STEM-კლუბს, მცირე სცენურ დარბაზს, მრავალფუნქციურ ღონისძიებების სივრცეს, ადმინისტრაციულ და ტექნიკურ ზონებს.
"ინფრასტრუქტურის სამინისტრო და მუნიციპალური განვითარების ფონდი განსაკუთრებულ მნიშვნელობას ანიჭებენ სახელმწიფო პროექტების დროულ და ხარისხიან განხორციელებას. თითოეულ პროექტზე ვადებისა და სახელშეკრულებო პირობების დაცვა წარმოადგენს ფუნდამენტურ მოთხოვნას და სამინისტრო ყველა პარტნიორისგან სწორედ ამ სტანდარტით მოქმედებას ელოდება.