მესხური ტრადიციის თანამედროვე ინტერპრეტაცია - ბაზარზე Baqmazia გამოჩნდა
ბაზარზე ორი თვეა მესხური ნუგბარის მწარმოებელი კომპანია Baqmazia გამოჩნდა, რომელიც ტრადიციული მესხური პროდუქტის, თუთის ბაქმაზის თანამედროვე ფორმით წარმოდგენას ცდილობს. როგორც ობიექტის დამფუძნებელი გიორგი მაღრაძე BM.GE-სთან ინტერვიუში აცხადებს, ბრენდის შექმნის იდეა მესხური სამზარეულოს უნიკალური, თუმცა ნაკლებად ცნობილი მემკვიდრეობის გაცნობის სურვილმა გააჩინა.
მისი თქმით, იდეა ერთ ჩვეულებრივ საუბარში დაიბადა, როცა მეგობრებთან ერთად მესხური სამზარეულოს მნიშვნელობასა და მის ნაკლებ ცნობადობაზე მსჯელობდნენ.
"Baqmazia-ს შექმნის იდეა ერთ ჩვეულებრივ საუბარში გაჩნდა. მე და ჩემი მეგობარი ხშირად ვსაუბრობდით იმაზე, თუ რამდენად მდიდარი და უნიკალურია მესხური სამზარეულო, მაგრამ ამავე დროს რამდენად ცოტა ადამიანი იცნობს მის ნამდვილ საგანძურს. განსაკუთრებით გული გვწყდებოდა ბაქმაზზე - თუთისგან დამზადებულ ტრადიციულ პროდუქტზე, რომელიც საუკუნეების განმავლობაში მესხური ოჯახების ნაწილი იყო, თუმცა დღეს ბევრისთვის თითქმის დავიწყებულია", - ამბობს გიორგი მაღრაძე.
მისივე თქმით, სწორედ ამ პროცესში გაჩნდა იდეა, ბაქმაზისთვის ახალი სიცოცხლე მიეცათ და შეექმნათ ნუგბარი, რომელიც ტრადიციასა და თანამედროვე გემოვნებას გააერთიანებდა.
"სწორედ მაშინ გაგვიჩნდა სურვილი, ბაქმაზისთვის ახალი სიცოცხლე შეგვეძინა. გვინდოდა შეგვექმნა ისეთი ნუგბარი, რომელიც ერთდროულად შეინარჩუნებდა მესხურ ტრადიციას და თანამედროვე ადამიანის გემოვნებასაც მოერგებოდა. ასე დაიბადა Baqmazia - პროდუქტი, რომელიც თუთის ბაქმაზს, ნიგოზს, თხილსა და შავი ქლიავის ჩირს აერთიანებს. ჩვენთვის ეს მხოლოდ ტკბილეული არ არის. ეს არის მცდელობა, რომ მესხეთის გემო, ისტორია და კულტურა უფრო მეტ ადამიანს გავაცნოთ.
დღეისათვის ყველაზე მოთხოვნადი პროდუქტი Baqmazia-ა. მომხმარებლების ყურადღებას განსაკუთრებით იქცევს მისი შემადგენლობა, თუთის ბაქმაზის გამოყენება და ის ფაქტი, რომ პროდუქტი დამატებული შაქრის გარეშე მზადდება“, - აღნიშნავს დამფუძნებელი.