მესტიაში [დენის] მოხმარების სწორ პრინციპებზე დაფუძნებული სისტემა უნდა დამკვიდრდეს - ირაკლი კობახიძე

ირაკლი კობახიძის განცხადებით, მესტიაში ელექტროენერგიის მოხმარების სწორ პრინციპებზე დაფუძნებული სისტემა უნდა დამკვიდრდეს. ამის შესახებ პრემიერმა ჟურნალისტების კითხვის საპასუხოდ განაცხადა.

„მნიშვნელოვანია ქვეყანაში ყველაფერი მოწესრიგდეს, მათ შორის მესტიის მუნიციპალიტეტში ელექტროენერგიის მოხმარება. დღეისთვის წლიური მოხმარება მესტიის მუნიციპალიტეტში 133 მლნ კვტ/სთ-ია, მაშინ როდესაც მსგავსი მუნიციპალიტეტის მოხმარება 7 მლნ კვტ/სთ-ია. ეს უნდა შეიცვალოს და დამკვიდრდეს სწორ პრინციპებზე დაფუძნებული მოხმარების სისტემა. ამას უზრუნველყოფს გამრიცხველიანება, რაც უახლოეს მომავალში დაიწყება“, - განაცხადა ირაკლი კობახიძემ.

მთავრობის გადაწყვეტილებით, კრიპტომაინინგის პრობლების აღმოსაფხვრელად, მესტიაში მოსახლეობის გამრიცხველიანება მოხდება, თუმცა ადგილობრივებისთვის ელექტროენერგია საჭირო მაქსიმალური რაოდენობის ფარგლებში კვლავ უფასო იქნება, ხოლო აღნიშნული რაოდენობის ზემოთ დაწესდება ლიმიტი და მათ ვინც ამ ლიმიტს გადააჭარბებს, დენის ტარიფის გადახდა მოუწევთ.

მესტიის მუნიციპალიტეტის მერი, კაპიტონ ჟორჟოლიანი მესტიის გამრიცხველიანების შესახებ მთავრობის გადაწყვეტილებას სრულ მხარდაჭერას უცხადებს და აცხადებს, რომ სოციალურად დაუცველები ელექტროენერგიას უფასოდ მიიღებენ.

გამანაწილებელ კომპანიაში კი bm.ge-ს უთხრეს, რომ "2026 წლის აპრილში მესტიამ მოიხმარა იმდენივე ელექტროენერგია, რაც დანარჩენი საქართველოს 15 -მა, შუახევის, ლენტეხის, ყაზბეგის, ონის, თიანეთის, ცაგერის, ქედას, ხულოს, დმანისის, ჩოხატაურის, ამბროლაურის, დედოფლისწყაროს, ჩხოროწყუს, თეთრიწყაროს და ხარაგაულის მუნიციპალიტეტების მოსახლეობამ ერთად. წინა თვეებში კი მესტიამ მოიხმარა იმდენი ელექტროენერგია, რაც 17-18 -მა მუნიციპალიტეტის მოსახლეობამ ერთად".