
მხარეთა შერიგების საფუძველზე, უსმან ნურმაგომედოვი და მისი თანმხლები პირები აბუ-დაბის ციხიდან გაათავისუფლეს
დაღესტნელი MMA-ის მებრძოლი უსმან ნურმაგომედოვი და მისი შვიდი მეგობარი, მერაბ დვალიშვილთან და საბა ლაზიშვილთან დაპირისპირების შემდეგ, აბუ-დაბის ციხიდან გაათავისუფლეს.
უსმანსა და მის შვიდ თანამზრახველს თავდაპირველად ექვსთვიანი პატიმრობა და თითოეულს 300 000 დირჰამის ($81 688) ოდენობის ჯარიმა მიესაჯა. საქმე ეხებოდა 11 ნოემბერს, ოთხშაბათს, სასტუმრო „იას ჰილტონში“ მომხდარ ჩხუბს, რომელშიც ქართველი მებრძოლები, მერაბ დვალიშვილი და საბა ლაზიშვილი მონაწილეობდნენ.
აბუ-დაბის სასამართლო დეპარტამენტის განცხადებით, ბრალდებულებისთვის გამოტანილი განაჩენი შეიცვალა და თითოეულ მათგანს ჯარიმა 150 000 დირჰამამდე ($40 844) შეუმცირდა.
უწყების განმარტებით, გადაწყვეტილების საფუძველი მხარეთა შერიგება, სარჩელების უკან გაწვევა და დაზარალებულების მიერ ბრალდებულთა გათავისუფლების მოთხოვნა გახდა.
გასულ კვირას უსმანი და მისი თანამოაზრეები სასტუმროს ფოიეში მერაბ დვალიშვილს თავს დაესხნენ, რომელიც სოციალური ქსელებისთვის ვიდეოს იღებდა. უსმანმა ქართველ მებრძოლს სახეში დაარტყა, რასაც დაპირისპირება მოჰყვა. ინციდენტის ამსახველი კადრები სოციალურ ქსელებში ფართოდ გავრცელდა. მომხდარის შემდეგ ათი ადამიანი დააკავეს.
შეგახსენებთ, რომ მოგვიანებით დვალიშვილი და ლაზიშვილი, გაათავისუფლეს. ორივეს 50 000 დირჰამის ($13 614) ოდენობის ჯარიმის გადახდა დაეკისრა, რაც საჭიდაო ორგანიზაცია RAF-მა დაფარა.
BM.GE
წყარო: bm.ge