"მოგვიწევს ამ ნებართვების გაუქმება" - კალაძე A კატეგორიის ტაქსის მძღოლებს აფრთხილებს

თბილისის მერი კახა კალაძე A კატეგორიის ტაქსის უვადო ნებართვის მფლობელებს მოუწოდებს, დაგროვილი დავალიანება დროულად გადაიხადონ. მერის განცხადებით, ვალდებულების შეუსრულებლობის შემთხვევაში, ლიცენზიები გაუქმდება და მათი აღდგენა ვეღარ მოხდება.

როგორც კალაძემ თბილისის მთავრობის სხდომაზე აღნიშნა, მიუხედავად იმისა, რომ მძღოლები „ადმინისტრაციული სახდელისგან გათავისუფლების შესახებ“ კანონის საფუძველზე ჯარიმებისგან გათავისუფლდნენ, 1 000-ზე მეტი ნებართვის მფლობელი სანებართვო პირობებს კვლავ უგულებელყოფს. მისივე თქმით, ისინი არ იხდიან ნებართვის გაცემის საფასურს, რის გამოც წინა თვეების დავალიანებას ყოველდღიურად ახალი თანხა ემატება.

„რა თქმა უნდა, ჩვენ ლიცენზიის ყველა მფლობელს ვუგზავნით შესაბამის ტექსტურ შეტყობინებას პირად ნომერზე და აქვთ ინფორმაცია, თუმცა კიდევ ერთხელ მინდა, მოვუწოდო მათ მეგობრებო, აუცილებლად გადაიხადეთ დავალიანება. წინააღმდეგ შემთხვევაში, ჩვენ მოგვიწევს ამ ნებართვების გაუქმება, რომელიც შემდეგ ვერანაირად ვერ აღდგება“, - განაცხადა კახა კალაძემ.

მერიის განმარტებით, საუბარია იმ პირებზე, რომელთაც A კატეგორიის ტაქსის უვადო ნებართვის გაცემის საფასური 2025 წლის ოქტომბრიდან დღემდე არ გადაუხდიათ. უწყებაში აცხადებენ, რომ მძღოლებს ინფორმაციას პერიოდულად როგორც წერილობითი გაფრთხილებებით, ისე სატელეფონო კომუნიკაციით აწვდიან.

რა სანქციებია გათვალისწინებული პირობების დარღვევისთვის:

• პირველადი ჯარიმა: ნებართვის გაცემის ფასის გადაუხდელობისთვის შეადგენს 100 ლარს. • მეორე ეტაპი (გასამმაგება): ჯარიმა განისაზღვრება 300 ლარით. • მესამე ეტაპი: ხელახალი გადაუხდელობის შემთხვევაში, ჯარიმის ოდენობა 900 ლარი ხდება. • დამატებითი სანქცია: ჯარიმების კანონით დადგენილ ვადაში გადაუხდელობის გამო, მძღოლებს დაეკისრებათ საურავები გამოწერილი ჯარიმების ორმაგი ოდენობით, რასაც საბოლოოდ ნებართვის გაუქმება მოჰყვება.