მთავრობამ აიპ სოფლის განვითარების სააგენტოს გამგეობის შემადგენლობა განსაზღვრა - ვინ არიან წევრები?

მთავრობამ სოფლის მეურნეობის განვითარების სააგენტოს გამგეობის შემადგენლობა განსაზღვრა. 30 აპრილს, ირაკლი კობახიძის მიერ ხელმოწერილი დოკუმენტით ცვლილება შევიდა 2011 წლის 17 დეკემბრის 2471-ე განკარგულების მეორე პუნქტში, რომელიც სააგენტოს გამგეობის თავმჯდომარეს და წევრებს ადგენს.

2026 წლის 874-ე განკარგულებიდან ვიგებთ, რომ სააგენტოს გამგეობა 8 წევრისგან შედგება, რომლის თავმჯდომარე გარემოს დაცვისა და სოფლის მეურნეობის მინისტრი დავით სონღულაშვილი იქნება. გამგეობაში წევრებად იქნებიან ეკონომიკისა და მდგრადი განვითარების მინისტრი მარიამ ქვრივიშვილი და ფინანსთა მინისტრი ლაშა ხუციშვილი.

წევრები იქნებიან ასევე გარემოს დაცვისა და სოფლის მეურნეობის მინისტრის მოადგილეები ნინო თანდილაშვილი, ზურაბ ეზუგბაია, გიორგი წკრიალაშვილი, ლაშა დოლიძე და ლაშა ავალიანი.

ცნობისთვის, სოფლის განვითარების სააგენტო საქართველოს გარემოს დაცვისა და სოფლის მეურნეობის სამინისტროს მიერ ინიციირებულ პროგრამებს/პროექტებს ახორციელებს.

1-ელი ივლისიდან, სოფლის მეურნეობის სექტორში თამაშის წესები იცვლება. სოფლის მეურნეობის სამინისტრო "აგროთანადაფინანსების სახელმწიფო პროგრამის" ახალ მოდელს ნერგავს, რომლის მიხედვით, პროექტებს ბანკების ნაცვლად ჯერ სამინისტროში შეაფასებენ ანუ საფინანსო ინსტიტუტის ფილტრს სახელმწიფო ბიუროკრატია ჩაანაცვლებს.

ცალკეული პროგრამებიდან ერთიან მოდელზე გადასვლა - ეს მთავარი სისტემური ცვლილებაა, რასაც მთავრობის აგროსექტორის მხარდამჭერი ახალი პროგრამა ითვალისწინებს. ამიერიდან სახელმწიფო პროექტებს არა ცალკეული კომპონენტების მიხედვით დააფინანსებს, არამედ მთლიანად პროექტის თანადაფინანსებაში შევა. აგროთანადაფინანსების ახალი სახელმწიფო პროგრამის ფარგლებში სახელმწიფო პროექტებში მაქსიმუმ 2 მილიონი და მინიმუმ 100 ათასი ლარის ინვესტიციით მიიღებს მონაწილეობას.