მთავრობამ საპატრიარქოს ქარელში შენობა-ნაგებობები და მიწის ნაკვეთი 1 ლარად გადასცა

მთავრობის განკარგულებით, ქარელში მდებარე სახელმწიფო საკუთრებაში არსებული უძრავი ქონება საქართველოს სამოციქულო ავტოკეფალურ მართლმადიდებელ ეკლესიას პირდაპირი მიყიდვის ფორმით, სიმბოლურ ფასად 1 ლარად გადაეცა.

დოკუმენტის თანახმად, საპატრიარქოს საკუთრებაში გადადის ქალაქ ქარელში, ვარძელაშვილის ქუჩა №155-ში მდებარე 5 533 კვ/მ არასასოფლო-სამეურნეო დანიშნულების მიწის ნაკვეთი. მასთან ერთად, ეკლესიას გადაეცემა ამავე ნაკვეთზე განთავსებული შენობა-ნაგებობები რომელთა საერთო ფართობი 924.91 კვ/მ-ს შეადგენს.

გამოცემული განკარგულების მიხედვით, ქონების გადაცემისთვის დაწესებულია კონკრეტული პირობები:

უძრავი ქონების საპრივატიზებო თანხა განისაზღვრა სიმბოლური 1 ლარით;

აღნიშნული თანხის გადახდა საპატრიარქომ შესაბამისი ხელშეკრულების გაფორმებიდან 1 თვის ვადაში უნდა უზრუნველყოს.

ამავე განკარგულებით, ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულ სააგენტოს დაევალა ხელშეკრულების გასაფორმებლად კანონმდებლობით გათვალისწინებული ყველა საჭირო ღონისძიების გატარება.