Oracle-მა თანამშრომელთა შემცირების ახალი ტალღა დაიწყო

ტექნოლოგიურმა გიგანტმა Oracle-მა თანამშრომელთა შემცირების ახალი ტალღა დაიწყო. როგორც ირკვევა, საკადრო ცვლილებების შესახებ ინფორმაცია გამოცემა Business Insider-მა შიდა ელექტრონულ წერილსა და გათავისუფლებულ თანამშრომლებზე დაყრდნობით გაავრცელა.

დათხოვნილ პერსონალს, რომლის რაოდენობაც გავრცელებული ცნობებით მთლიანი სამუშაო ძალის 10%-ს აღწევს, კომპანიამ ოთხი კვირის საბაზისო ხელფასი და დამატებით თითოეულ ნამუშევარ წელზე ერთი კვირის ანაზღაურება შესთავაზა.

აღსანიშნავია, რომ კომპანია სახელფასო ხარჯების შემცირებას იმ მიზნით ისახავს, რომ ხელოვნური ინტელექტის ინფრასტრუქტურის დაფინანსება გააძლიეროს. როგორც ცნობილია, Oracle-მა მონაცემთა ცენტრების მშენებლობის პროცესში ათობით მილიარდი დოლარის ოდენობის ვალი დააგროვა. პირველ კვარტალში კომპანიის კაპიტალურმა დანახარჯებმა, გასული წლის $8.5 მილიარდთან შედარებით, $28.5 მილიარდი შეადგინა. შესაბამისად, ტექ-გიგანტის ფინანსური ნაკადები უარყოფით მაჩვენებელში წლების შემდეგ პირველად გადავიდა.

საყურადღებოა, რომ ხელმძღვანელობა რთული ვითარების მიუხედავად გაჩერებას არ გეგმავს და 2027 ფისკალური წლისთვის კაპიტალური დანახარჯების გაზრდას $90-$95 მილიარდამდე აპირებს. აღსანიშნავია, რომ ღრუბლოვანი სერვისების მიმართულების ზრდის მიუხედავად, უოლ-სტრიტი ტექ-გიგანტის მიერ აღებული კურსის წარმატებაში ჯერჯერობით დარწმუნებული არ არის.